രാജ്‌കോട്ട്: ഫസ്റ്റ് ക്ലാസ് ക്രിക്കറ്റില്‍ ഏറ്റവും കൂടുതല്‍ ഇരട്ട ശതകം നേടുന്ന ഇന്ത്യന്‍ ബാറ്റ്‌സ്മാനെന്ന റെക്കോര്‍ഡ് ഇനി ഇന്ത്യന്‍ ടെസ്റ്റ് ടീമിന്റെ നെടുംതൂണായ ചേതേശ്വര്‍ പൂജരയ്ക്ക് സ്വന്തം. ജാര്‍ഖണ്ഡിനെതിരായ രഞ്ജി പോരാട്ടത്തില്‍ ഇരട്ട സെഞ്ച്വറി (205) നേടിയാണ് താരം റെക്കോര്‍ഡ് സ്വന്തം പേരിലാക്കിയത്.
സൗരാഷ്ട്രയുടെ ക്യാപ്റ്റന്‍ കൂടിയായ പൂജാര ഫസ്റ്റ് ക്ലാസ് ക്രിക്കറ്റിലെ തന്റെ 12ാം ഡബിള്‍ സെഞ്ച്വറിയാണ് രാജ്‌കോട്ടില്‍ നടക്കുന്ന പോരാട്ടത്തില്‍ സ്വന്തമാക്കിയത്.
11 സെഞ്ച്വറികള്‍ നേടിയ വിജയ് മര്‍ച്ചന്റിന്റെ പേരിലുള്ള റെക്കോര്‍ഡാണ് പൂജാരയ്ക്ക് മുന്നില്‍ വഴി മാറിയത്. ക്യാപ്റ്റന്റെ കരുത്തുറ്റ ഇന്നിങ്‌സിന്റെ ബലത്തില്‍ സൗരാഷ്ട്ര ഒന്‍പത് വിക്കറ്റ് നഷ്ടത്തില്‍ 553 റണ്‍സെടുത്ത് ഒന്നാം ഇന്നിങ്‌സ് ഡിക്ലയര്‍ ചെയ്തു. രാഹുല്‍ ദ്രാവിഡ്, സുനില്‍ ഗവാസ്‌കര്‍, വിജയ് ഹസാരെ എന്നിവര്‍ക്ക് ഫസ്റ്റ് ക്ലാസില്‍ പത്ത് ഇരട്ട സെഞ്ച്വറികളുണ്ട്.