ഇംഫാല്‍: മണിപ്പൂരില്‍ സൈന്യവുമായുണ്ടായ ഏറ്റുമുട്ടലില്‍ ഒരു ഭീകരന്‍ കൊല്ലപ്പെട്ടു. മ്യാന്മറിനോട് ചേര്‍ന്ന ചന്ദല്‍ ജില്ലയിലെ ചമോല്‍ ഗ്രാമത്തിലാണ് ഏറ്റുമുട്ടലുണ്ടായത്. സംഭവത്തില്‍ അസം റൈഫിള്‍സിലെ രണ്ട് ജവാന്മാര്‍ക്ക് പരുക്കേറ്റിട്ടുണ്ട്.
ഇന്നലെ പുലര്‍ച്ചെ അഞ്ചോടെ ഭീകരര്‍ കുഴിബോംബ് സ്ഥാപിക്കുന്നതിനിടയിലാണ് സൈന്യവുമായി ഏറ്റുമുട്ടലുണ്ടായത്. കൊല്ലപ്പെട്ട ഭീകരനെ തിരിച്ചറിഞ്ഞിട്ടില്ലെന്ന് പ്രതിരോധവക്താവ് അറിയിച്ചു. കൊല്ലപ്പെട്ടയാളില്‍ നിന്ന് തോക്കുകളും കുഴിബോംബുകളും കണ്ടെടുത്തിട്ടുണ്ട്. പ്രദേശത്തേക്ക് കൂടുതല്‍ സൈന്യം എത്തി ഭീകരര്‍ക്കായി തിരച്ചില്‍ ശക്തമാക്കിയിട്ടുണ്ട്. കഴിഞ്ഞ തിങ്കളാഴ്ച അസം റൈഫിള്‍സിലെ രണ്ട് ജവാന്‍മാര്‍ കൊല്ലപ്പെടുകയും ആറുപേര്‍ക്ക് പരുക്കേല്‍ക്കുകയും ചെയ്തിരുന്നു. ഇതേത്തുടര്‍ന്ന് സുരക്ഷ ശക്തമാക്കിയതിനിടയിലാണ് വീണ്ടും ഏറ്റുമുട്ടലുണ്ടായത്. തിങ്കളാഴ്ചയുണ്ടായ ആക്രമണത്തിന്റെ ഉത്തരവാദിത്തം നിരോധിത ഭീകരസംഘടനയായ റെവല്യൂഷണറി പീപ്പിള്‍സ് ഫ്രണ്ട് ഏറ്റെടുത്തിരുന്നു.