കൊല്ലം: ചാംപ്യന്‍മാര്‍ തങ്ങളാണെന്നും സര്‍ക്കാര്‍ മോശമാണെന്നും വരുത്തി തീര്‍ക്കാന്‍ സി.പി.ഐ ശ്രമിക്കുന്നുവെന്ന് സി.പി.എം സംസ്ഥാന സെക്രട്ടേറിയറ്റംഗം ആനത്തലവട്ടം ആനന്ദന്‍. സി.പി.എം കൊല്ലം ഏരിയാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. തോളത്തിരുന്ന് ചെവി കടിക്കുന്ന പണിയാണ് സി.പി.ഐ നടത്തുന്നത്. സി.പി.ഐയ്ക്ക് ഒറ്റയ്ക്ക് ഒരു ചുക്കും ചെയ്യാന്‍ പറ്റില്ലെന്നും അദ്ദേഹം വ്യക്തമാക്കി. വലിയ വായില്‍ സംസാരിക്കുന്ന സി.പി.ഐ സര്‍ക്കാരിനെ ക്ഷീണിപ്പിക്കാന്‍ ശ്രമിക്കുന്നുവെന്നും ആനത്തലവട്ടം പറഞ്ഞു.

സോളാര്‍ സമരം അവസാനിപ്പിച്ചത് ഒത്തുകളിയാണെന്ന് സി.പി.ഐ ആരോപിച്ചു. കമ്മീഷന്‍ റിപ്പോര്‍ട്ട് പുറത്തുവന്നപ്പോള്‍ സി.പി.ഐ എന്തു പറയുന്നുവെന്നും അദ്ദേഹം ചോദിച്ചു. ചാണ്ടിയേക്കാള്‍ ജനങ്ങളുടെ സമ്പത്തുള്ള പാര്‍ട്ടിയാണ് സി.പി.എം എന്നും അദ്ദേഹം കൂട്ടിച്ചേര്‍ത്തു. പാര്‍ലമെന്റ് തെരഞ്ഞെടുപ്പില്‍ സി.പി.ഐ ഏത് മുന്നണിയില്‍ പോകുമെന്ന് അറിയില്ലെന്നും അദ്ദേഹം പറഞ്ഞു.