ഹരാരെ: സിംബാബ്‌വെ പ്രസിഡന്റ് റോബര്‍ട്ട് മുഗാബെയെ പ്രസിഡന്റ് സ്ഥാനത്തുനിന്നും ഇംപീച്ച്‌മെന്റ് ചെയ്യാനുള്ള നടപടികള്‍ തുടങ്ങി. നടപടിക്രമങ്ങള്‍ പൂര്‍ത്തിയായായാല്‍ പ്രസിഡന്റ് സ്ഥാനത്ത് നിന്നും നാളെ മുഗാബെയെ പുറത്താക്കുമെന്ന് സാനു-പി.എഫ് പാര്‍ട്ടി പ്രഖ്യാപിച്ചു. പ്രസിഡന്റ് പദവി രാജിവയ്ക്കാന്‍ സ്വന്തം പാര്‍ട്ടിയായ സാനു-പി.എഫ് അനുവദിച്ച സമയപരിധി അവസാനിച്ചെങ്കിലും തീരുമാനം പ്രഖ്യാപിക്കാത്തതിനെ തുടര്‍ന്നാണ് ഇംപീച്ച്‌മെന്റ നടപടിക്ക് തീരുമാനം എടുത്തത്. രാത്രിയോടെ പ്രസിഡന്റ് പദവി രാജിവയ്ക്കണമെന്ന് സാനു-പി.എഫ് നേതാക്കള്‍ മുഗാബെയ്ക്ക് അന്ത്യശാസന നല്‍കിയിരുന്നുന്നത്. മുഗാബെ സ്വയം ഒഴിഞ്ഞില്ലെങ്കില്‍ ഇന്ന് പാര്‍ലമെന്റ് ചേര്‍ന്ന് ഇംപീച്ച്‌മെന്റ് നടപടികളിലേക്കു നീങ്ങാനായിരുന്നു തീരുമാനം. എന്നാല്‍, കഴിഞ്ഞ ദിവസം ടെലിവിഷനില്‍ പ്രത്യക്ഷപ്പെട്ട മുഗാബെ പ്രസിഡന്റ് പദവിയില്‍ തന്നെ തുടരുമെന്നു പ്രഖ്യാപിക്കുകയായിരുന്നു. ഇംപീച്ച്‌മെന്റ് നടപടിയുടെ ഭാഗമായി മുഗാബെയടെ ഭാര്യ ഗ്രേസ് മുഗാബെയില്‍നിന്ന് ഭരണഘടനാ അധികാരങ്ങള്‍ തിരിച്ചെടുക്കുന്നതാണ് .

ആഴ്ചകള്‍ക്കു മുന്‍പ് എമ്മേഴ്‌സനെ വൈസ് പ്രസിഡന്റ് സ്ഥാനത്തുനിന്നു നീക്കിയതോടെയാണ് സിംബാബ്‌വെയില്‍ നാടകീയമായ നീക്കങ്ങള്‍ക്കു കളമൊരുങ്ങിയത്. പാര്‍ട്ടിയിലും സര്‍ക്കാരിലും പിടിമുറുക്കാനുള്ള മുഗാബെയുടെ ഭാര്യയുടെ ശ്രമത്തിനെതിരേ പ്രതികരിച്ചതാണ് എമ്മേഴ്‌സന് വിനയായത്. എന്നാല്‍, എമ്മേഴ്‌സന്റെ ഉറ്റകൂട്ടാളിയായ സൈനിക മേധാവി കോണ്‍സ്റ്റാന്റിനോ ചിവേംഗയുടെ നേതൃത്വത്തില്‍ സൈന്യം മുഗാബെയെ കഴിഞ്ഞ ബുധനാഴ്ച വീട്ടുതടങ്കലിലാക്കി. ഹരാരെയിലെ ഭരണകേന്ദ്രങ്ങള്‍ നിയന്ത്രണത്തിലാക്കുകയും ചെയ്തു. 1980ല്‍ സിംബാബ്‌വെ ബ്രിട്ടനില്‍നിന്നു സ്വാതന്ത്ര്യം നേടിയതുമുതല്‍ 93കാരനായ മുഗാബെയാണു രാജ്യത്തെ നയിക്കുന്നത്.