കൊച്ചി: ആസൂത്രണമില്ലാതെ ജി.എസ്.ടി നടപ്പാക്കിയത് രാജ്യത്തെ ചെറുകിട വ്യാപാര വാണിജ്യ മേഖലയെ തകര്‍ത്തുവെന്നും ജി.എസ്.ടിയുടെ പേരില്‍ നികുതി ഭീകരത നടപ്പാക്കുകയാണ് മോദിസര്‍ക്കാരെന്നും കോണ്‍ഗ്രസ് വക്താവ് രണ്‍ദീപ് സിങ് സുര്‍ജേവാല വാര്‍ത്താസമ്മേളനത്തില്‍ പറഞ്ഞു. ഒറ്റ രാജ്യം, ഒറ്റ നികുതി എന്നതായിരുന്നു യു.പി.എ സര്‍ക്കാര്‍ വിഭാവനം ചെയ്ത ജി.എസ്.ടി. എന്നാല്‍, മോദി സര്‍ക്കാര്‍ അത് ഒരു രാജ്യം, ഏഴ് നികുതി എന്നാക്കി മാറ്റിയെന്നും അദ്ദേഹം കുറ്റപ്പെടുത്തി.
കേന്ദ്ര സര്‍ക്കാരിന്റെ വീണ്ടുവിചാരമില്ലാത്ത നടപടി രാജ്യത്തെ നികുതിഘടനയെ തകര്‍ത്തു. ജി.എസ്.ടിയുടെ മറവില്‍ ലോകത്തെ ഏറ്റവും ഉയര്‍ന്ന നികുതി നിരക്കാണ് കേന്ദ്ര സര്‍ക്കാര്‍ ഈടാക്കുന്നത്. വേണ്ടത്ര മുന്നൊരുക്കമോ ആസൂത്രണമോ വ്യക്തതയോ ഇല്ലാതെ കേന്ദ്ര സര്‍ക്കാര്‍ നടപ്പാക്കിയ നോട്ടു നിരോധനം രാജ്യം കണ്ട ഏറ്റവും വലിയ കൊള്ളയാണെന്നും കോണ്‍ഗ്രസ് വക്താവ് പറഞ്ഞു.
മാധ്യമങ്ങളെ നിശ്ശബ്ദരാക്കുക, എതിര്‍ ശബ്ദങ്ങളെ അടിച്ചമര്‍ത്തുക എന്നതാണ് പിണറായി സര്‍ക്കാരിന്റെ നയമെന്ന് സുര്‍ജേവാല വിമര്‍ശിച്ചു. ജനവിരുദ്ധ നയങ്ങളുടെ കാര്യത്തില്‍ കേന്ദ്രസര്‍ക്കാരും പിണറായി സര്‍ക്കാരും മത്സരിക്കുകയാണെന്നും അദ്ദേഹം കൂട്ടിച്ചേര്‍ത്തു.