മോര്‍ബി: 'തെരഞ്ഞെടുപ്പില്‍ ബി.ജെ.പി പരാജയപ്പെട്ടാല്‍ അത് നമ്മുടെ മഹത്തായ വിജയമായിരിക്കും. അതേസമയം ബി.ജെ.പി വിജയിക്കുകയാണെങ്കില്‍ അത് പട്ടേല്‍ സമുദായത്തിന്റെ വലിയ പരാജയമായി കണക്കാക്കണം'. ഗുജറാത്തിലെ മോര്‍ബിയില്‍ പട്ടീദാര്‍ അനാമത് ആന്ദോളന്‍ സമിതി നേതാവ് ഹാര്‍ദിക് പട്ടേല്‍ മോര്‍ബിയിലെ പട്ടേല്‍ സമുദായങ്ങള്‍ തിങ്ങിപ്പാര്‍ക്കുന്ന മേഖലയില്‍ നടത്തിയ പ്രസംഗത്തിലാണ് ഇത്തരത്തില്‍ അഭിപ്രായപ്പെട്ടത്.
തെരഞ്ഞെടുപ്പില്‍ ബി.ജെ.പി വിജയിച്ചാല്‍ അത് പട്ടേല്‍സമുദായത്തിനേല്‍ക്കുന്ന വലിയ തിരിച്ചടിയായിരിക്കും. പ്രചാരണത്തില്‍ പ്രധാനമന്ത്രി മോദിയെ ലക്ഷ്യം വച്ചാണ് ഹാര്‍ദിക് പ്രചാരണം നടത്തുന്നത്. രണ്ട് പതിറ്റാണ്ടായി സംസ്ഥാനം ഭരിക്കുന്നത് ബി.ജെ.പിയാണ്. അവര്‍ എന്തുചെയ്‌തെന്ന് ജനങ്ങള്‍ കണ്ണുതുറന്ന് കാണണം. വോട്ട് അഭ്യര്‍ഥിച്ചുകൊണ്ട് മോദി ജനങ്ങള്‍ക്ക് മുന്‍പില്‍ കരയുകയാണ്. എന്നാല്‍ എല്ലാവര്‍ക്കും അറിയാം അവര്‍ ഒഴുക്കുന്നത് മുതലക്കണ്ണീരാണെന്ന്.
മുന്‍കാലത്ത് കോണ്‍ഗ്രസ് എന്ത് ചെയ്തു, എന്ത് ചെയ്തില്ല എന്നതല്ല നമ്മുടെ വിഷയം. മറിച്ച് ബി.ജെ.പിയെപോലുള്ളവരെ അധികാരത്തില്‍ നിന്ന് മാറ്റി നിര്‍ത്തുകയെന്നതാണെന്നും ഹാര്‍ദിക് പട്ടേല്‍ പറഞ്ഞു. ഇന്നലെ സംസ്ഥാനത്തിന്റെ വിവിധ ഭാഗങ്ങളില്‍ ഹാര്‍ദിക് നടത്തിയ റോഡ് ഷോയ്ക്ക് വന്‍ജനപങ്കാളിത്തമാണ് ഉണ്ടായിരുന്നത്.