സോമനാഥ്: ഗുജറാത്തില്‍ ഉണ്ടാകാന്‍ പോകുന്ന വലിയ വിജയം വച്ചുനോക്കുമ്പോള്‍ ഉത്തര്‍പ്രദേശിലെ തദ്ദേശ തെരഞ്ഞെടുപ്പു വിജയമൊന്നും ഒന്നുമല്ലെന്ന് ബി.ജെ.പി ദേശീയ അധ്യക്ഷന്‍ അമിത് ഷാ. ഉത്തര്‍പ്രദേശിലെ തദ്ദേശഭരണ തെരഞ്ഞെടുപ്പില്‍ 16 കോര്‍പ്പറേഷനുകളില്‍ 14 ഇടത്തും ബി.ജെ.പി വിജയിച്ചിരുന്നു. ഇതിന്റെ പശ്ചാത്തലത്തിലാണു അമിത്ഷായുടെ പ്രതികരണം.

യു.പി തെരഞ്ഞെടുപ്പില്‍ കോണ്‍ഗ്രസിന് ഒരു സീറ്റില്‍ പോലും വിജയിക്കാന്‍ കഴിഞ്ഞില്ല. അതേസമയം, പ്രധാനമന്ത്രി നരേന്ദ്ര മോദിയുടെയും മുഖ്യമന്ത്രി യോഗി ആദിത്യനാഥിന്റെയും നേതൃത്വത്തില്‍ വന്‍ വിജയമാണ് ബി.ജെ.പി നേടിയിരിക്കുന്നതെന്നും ഗിര്‍ സോമനാഥ് ജില്ലയില്‍ നടന്ന റാലിയില്‍ അമിത് ഷാ പറഞ്ഞു.

കഴിഞ്ഞ മൂന്നുമാസമായി കോണ്‍ഗ്രസ് പറയുന്നത് 'ഗുജറാത്തിലേക്കു കോണ്‍ഗ്രസ് എത്തുന്നു'വെന്നാണ്. എന്നാല്‍ ഇന്ന് ഉത്തര്‍പ്രദേശിലെ ജനങ്ങള്‍ പറഞ്ഞു, 'കോണ്‍ഗ്രസ് പോകുകയാണെന്ന്'

രാഹുല്‍ ഗാന്ധിയുടെ മണ്ഡലമായ അമേഠിയിയില്‍ പോലും ഒരു സീറ്റ് നേടാന്‍ കോണ്‍ഗ്രസിനായില്ല. എല്ലാ സീറ്റുകളിലും ബി.ജെ.പിയാണ് ജയിച്ചത്. ഗുജറാത്തില്‍ ഈ മാസം 18ന് നടക്കുന്ന തെരഞ്ഞെടുപ്പ് ഫലത്തിനോട് ഇതിനെ താരതമ്യം ചെയ്യണ്ട. 18ലെ വോട്ടെണ്ണലിനുശേഷം ബി.ജെ.പി വലിയ വിജയം നേടുമെന്നും 150 സീറ്റുകളുമായി സര്‍ക്കാര്‍ രൂപീകരിക്കുമെന്നും അമിത് ഷാ പറഞ്ഞു.