ബിയു: നൈജീരിയന്‍ പട്ടണമായ ബിയുവില്‍ ഇരട്ട ചാവേറാക്രമണത്തില്‍ 17 പേര്‍ കൊല്ലപ്പെട്ടു. ആക്രമണത്തിനു പിന്നില്‍ തീവ്രവാദ സംഘടനായ ബോക്കൊ ഹറം ആണെന്ന് നൈജിരിയന്‍ സര്‍ക്കാര്‍ കേന്ദ്രങ്ങള്‍ അറിയിച്ചു.

47 പേര്‍ക്ക് ആക്രമണത്തില്‍ പരുക്കേറ്റു. കൂടുതല്‍ പേരും ഗുരുതരാവസ്ഥയിലാണ്.

മുമ്പും പല പ്രാവശ്യം ബോക്കൊ ഹറം ആക്രമണം നടന്ന നഗരമാണിത്. കഴിഞ്ഞ് ആറു മാസമായി ഇവിടെ നിരന്തരം സ്‌ഫോടനങ്ങള്‍ നടക്കുകയാണ്.

ഇന്നു നടന്ന ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. എന്നാല്‍, ആക്രമണത്തിനു പിന്നില്‍ ബോക്കൊ ഹറമാണെന്നാണ് ഔദ്യോഗിക വൃത്തങ്ങള്‍ പറയുന്നത്.

ഭയപ്പാടിന്റെ എട്ടു വര്‍ഷം

2009 ലാണ് ബോക്കൊ ഹറം നൈജീരിയയില്‍ ആക്രമണം നടത്താനാരംഭിച്ചത്. ഇതിനകം 20,000 ജനങ്ങള്‍ കൊല്ലപ്പെടുകയും 17 ലക്ഷം പേര്‍ക്ക് വീട് നഷ്ടപ്പെടുകയും ചെയ്തു.

ബോക്കൊ ഹറമിനെതിരെ നൈജീരിയന്‍ സേന നിരന്തരം ഏറ്റുമുട്ടല്‍ നടത്തുന്നുണ്ട്.

കഴിഞ്ഞ ഏപ്രില്‍ മുതലുണ്ടായ 400 മരണങ്ങള്‍ക്ക് ഉത്തരവാദി ബോക്കൊ ഹറം ആണെന്ന് ആംനസ്റ്റി റിപ്പോര്‍ട്ടില്‍ പറയുന്നു.