സിയൂള്‍: ദക്ഷിണ കൊറിയയില്‍ മത്സബന്ധന ബോട്ടും ഇന്ധന കപ്പലും കൂട്ടിയിടിച്ചുണ്ടായ അപകടത്തില്‍ 13 പേര്‍ മരിച്ചു. രണ്ടുപേരെ കാണാതാകുകയും നിരവധി പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്.കഴിഞ്ഞ ദിവസം ദ.കൊറിയയുടെ പടിഞ്ഞാറന്‍ തീരത്തായിരുന്നു സംഭവം. 20 തൊഴിലാളികളും രണ്ട് ജീനക്കാരുമടക്കം യാത്ര തിരിച്ച സിയോചാങ്-1 എന്ന പേരിലുള്ള മത്സ്യബന്ധന ബോട്ട് 336 ടണ്‍ ഭാരമുള്ള ടാങ്കറിലിടിച്ചു മറിയുകയായിരുന്നു. നാവി ഹെലികോപ്ടറും നിരവധി കപ്പലുകളും ചേര്‍ന്നാണു രക്ഷാപ്രവര്‍ത്തനം നടത്തിയത്. കാണാതായവരില്‍ ബോട്ട് ക്യാപ്റ്റനുമുണ്ട്.
മത്സ്യബന്ധന ബോട്ട് തീരത്തുനിന്ന് പുറപ്പെട്ട് മിനിറ്റുകള്‍ക്കകമാണ് അപകടമുണ്ടായതെന്ന് ദ.കൊറിയ വാര്‍ത്താ ഏജന്‍സി യോന്‍ഹാപ്പ് റിപ്പോര്‍ട്ട് ചെയ്തു. അതേസമയം, ടാങ്കര്‍ കപ്പലില്‍ ആളപായമോ പരുക്കോ സംഭവിച്ചിട്ടില്ല. അപകട കാരണം വ്യക്തമല്ല. ജലത്തിന്റെ ശീതനില ഉയര്‍ന്നത് ആളപായം വര്‍ധിക്കാനിടയാക്കിയതായി അധികൃതര്‍ പറഞ്ഞു.2015ല്‍ ജെജുവിനടുത്ത് മത്സ്യബന്ധന ബോട്ട് മറിഞ്ഞ് 15 പേരുടെ മരണത്തിനിടയാക്കിയ സംഭവത്തിനു ശേഷം ദ.കൊറിയയിലെ ഏറ്റവും വലിയ ബോട്ടപകടമാണിത്. ഒരു വര്‍ഷം മുന്‍പ് യാത്രാകപ്പല്‍ മറിഞ്ഞുണ്ടായ അപകടത്തില്‍ വിദ്യാര്‍ഥികളടക്കം 300 പേര്‍ മരിച്ചിരുന്നു.