കൊച്ചി: ആര്‍.സി.സിയില്‍ ചികിത്സയിലിരിക്കെ രക്തം സ്വീകരിച്ച ഒന്‍പതു വയസുകാരിക്ക് എച്ച്.ഐ.വി ബാധയില്ലെന്ന് വിദഗ്ധ പരിശോധനയില്‍ തെളിഞ്ഞാല്‍ രോഗബാധയുണ്ടെന്ന് റിപ്പോര്‍ട്ട് നല്‍കിയവര്‍ക്കെതിരേ കര്‍ശന നടപടിയെടുക്കുമെന്ന് ഹൈക്കോടതി. രക്തം സ്വീകരിച്ച തന്റെ മകള്‍ക്ക് എച്ച്.ഐ.വി ബാധിച്ച സംഭവത്തില്‍ നടപടി വേണമെന്നാവശ്യപ്പെട്ട് പിതാവ് നല്‍കിയ ഹരജിയിലാണ് സിംഗിള്‍ ബെഞ്ചിന്റെ മുന്നറിയിപ്പ്.
കഴിഞ്ഞദിവസം ഹരജി പരിഗണിച്ചപ്പോള്‍ ചെന്നൈയില്‍ നടത്തിയ എച്ച്.ഐ.വി പരിശോധനയുടെ റിപ്പോര്‍ട്ടിനായി കാത്തിരിക്കുകയാണെന്നും നേരത്തെ നാഷനല്‍ ഇന്‍സ്റ്റിറ്റ്യൂട്ട് ഓഫ് ടി.ബി ആന്‍ഡ് റിസര്‍ച്ചിലെ പരിശോധനയില്‍ എച്ച്.ഐ.വി ബാധയില്ലെന്ന് റിപ്പോര്‍ട്ടുണ്ടായിരുന്നെന്നും സര്‍ക്കാര്‍ അഭിഭാഷകന്‍ കോടതിയില്‍ ബോധിപ്പിച്ചു. ഇപ്പോള്‍ ചെന്നൈയിലെ പരിശോധനാ റിപ്പോര്‍ട്ടിനുപുറമേ ഡല്‍ഹിയിലെ നാഷനല്‍ ഇന്‍സ്റ്റിറ്റ്യൂട്ടില്‍ നിന്നുള്ള പരിശോധനാ റിപ്പോര്‍ട്ടും വരേണ്ടതുണ്ടെന്ന് അഭിഭാഷകന്‍ വ്യക്തമാക്കി.
തുടര്‍ന്നാണ് അന്തിമ റിപ്പോര്‍ട്ടില്‍ എച്ച്.ഐ.വി ബാധയില്ലെന്ന് തെളിഞ്ഞാല്‍ ആദ്യ റിപ്പോര്‍ട്ട് നല്‍കിയവര്‍ ഗുരുതര പ്രത്യാഘാതം നേരിടേണ്ടിവരുമെന്ന് കോടതി പറഞ്ഞത്.