കായംകുളം: എയ്ഡഡ് കോളജുകളില്‍ അധ്യാപക നിയമനത്തില്‍ പട്ടികജാതി,വര്‍ഗ വിഭാഗങ്ങള്‍ക്ക് സംവരണം കൊടുക്കണമെന്ന ഹൈക്കോടതി വിധിയുണ്ടായപ്പോള്‍ അതിനെ ചോദ്യംചെയ്ത് അപ്പീല്‍പോയ എസ്.എന്‍.ഡി.പി നിലപാട് ശരിയല്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷണന്‍. യു.ജി.സി നിബന്ധനകള്‍ വച്ചുകൊണ്ടാണ് ഹൈക്കോടതി വിധിയുണ്ടായത്. വിധി നടപ്പിലാക്കാന്‍ ഇടതുപക്ഷ സര്‍ക്കാര്‍ ശ്രമിച്ചു. ഇതിനായി മന്ത്രി സഭയുടെ നിര്‍ദേശവും വന്നു. ഈ അവസരത്തില്‍ സമുദായ സംഘടനകള്‍ അപ്പീല്‍ പോയത് ഹൈക്കോടതി ഡിവിഷന്‍ബെഞ്ച് സിംഗിള്‍ ബഞ്ചിന്റെ വിധി റദ്ദാക്കി. അപ്പീലിനുപോയ എന്‍.എസ്.എസിന് സംവരണത്തിലുള്ള നിലപാട് മനസിലാകും. സമുദായ സംവരണത്തിനുവേണ്ടി വാദിക്കുകയും പോരാടുകയും ചെയ്യുന്ന എസ്.എന്‍.ഡി.പി നേതൃത്വം എന്തിനാണ് ഹൈക്കോടതിയില്‍ അപ്പീല്‍ പോയതെന്ന് വ്യക്തമാക്കണമെന്നും കോടിയേരി ആവശ്യപ്പെട്ടു.