മണ്ണാര്‍ക്കാട്: ദേശീയ പാതയിലെ പൊലിസ് പരിശോധന ഭയന്ന് റോഡില്‍ തിരിച്ച ബൈക്ക് ബസിനടിയില്‍പ്പെട്ട് വീട്ടമ്മക്ക് ഗുരുതരമായി പരുക്കേറ്റു. ചൊവ്വാഴ്ച ഉച്ചക്ക് 11.30ഓടെയാണ് കുമരംപുത്തൂര്‍ കല്ലടി ഹയര്‍ സെക്കന്‍ഡറി സ്‌കൂളിന് സമീപം അപകടമുണ്ടായത്.
അപകടത്തെ തുടര്‍ന്ന് നാട്ടുകാര്‍ ഏറെനേരം ഗതാഗതം തടസ്സപ്പെടുത്തി. അപകടമേഖലയായ കല്ലടി കോളജ് മുതല്‍ ചുങ്കം ജംഗ്ഷന്‍ വരെയുളള ദേശീയ പാതയില്‍ പൊലിസ് പരിശോധന ഒഴിവാക്കാമെന്ന ഉന്നത പൊലിസ് ഉദ്യോഗസ്ഥരുടെ ഉറപ്പിനെ തുടര്‍ന്നാണ് നാട്ടുകാര്‍ പിരിഞ്ഞ് പോയത്. കുമരംപുത്തൂര്‍ പളളിക്കുന്ന് വിസപ്പടി കക്കാടന്‍ റഷീദിന്റെ ഭാര്യ റംല (55)ന്റെ ഇരുകാലുകള്‍ക്കുമാണ് സാരമായി പരുക്കേറ്റത്. മകന്‍ ഉബീസിനൊപ്പം ബൈക്കില്‍ വരുമ്പോഴാണ് അപകടം. പൊലിസിന്റെ കണ്ട് ബൈക്ക് പെട്ടെന്ന് തിരിച്ചപ്പോള്‍ തൊട്ടുപിറകിലുണ്ടായിരുന്ന കെ.എസ്.ആര്‍.ടി.സി ബസിടിച്ചാണ് അപകടം. പരുക്കേറ്റ റംലയെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചു അടിയന്തിര ശസ്ത്രക്രിയ നടത്തി.