മൂവാറ്റുപുഴ: നിറുത്തിയിട്ടിരുന്ന തടിലോറിക്ക് പിന്നില്‍ മിനി ലോറി ഇടിച്ച് രണ്ട് പേര്‍ക്ക് പരുക്കേറ്റു. മിനി ലോറി ഡ്രൈവര്‍ ഇടുക്കി കട്ടപ്പന പുതുപ്പള്ളികുന്നേല്‍ സാബു, ക്ലീനര്‍ കട്ടപ്പന താഴേത്തില്‍കണ്ടം സിജോ എന്നിവര്‍ക്കാണ് പരുക്കേറ്റത്. ഗുരുതരമായി പരുക്കേറ്റ ഇവരെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
തിങ്കളാഴ്ച രാത്രി 11ന് എം.സി.റോഡില്‍ തൃക്കളത്തൂരിലാണ് അപകടം. പെരുമ്പാവൂര്‍ക്ക് തടിയുമായി പോകുകയായിരുന്ന ലോറി റോഡരികില്‍ നിറുത്തിയിട്ടിരിക്കുകയായിരുന്നു. പിന്നില്‍ നിന്നെത്തിയ മിനിലോറി ലോറിയിലുടെ പിന്നില്‍ ഇടിക്കുകയായിരുന്നു.
ഇടിയുടെ ആഘാതത്തില്‍ മിനി ലോറി പൂര്‍ണമായും തകര്‍ന്നു. നാട്ടുകാരും ഫയര്‍ഫോഴ്‌സും ചേര്‍ന്നാണ് ലോറിക്കുള്ളില്‍ നിന്നും ഡ്രൈവറെയും ക്ലീനറെയും പുറത്തെടുത്തത്. ഉടന്‍ ആശുപത്രിയില്‍ എത്തിക്കുകയായിരുന്നു. ഈമേഖലയില്‍ സ്ട്രീറ്റ് ലൈറ്റ് ഇല്ലാത്തതാണ് അപകടത്തിന് കാരണമെന്ന് നാട്ടുകാര്‍ പറഞ്ഞു.