മഹാരാജാസ് കോളജ് ഇന്ന് തുറക്കും;കാമ്പസില്‍ പൊലിസ് സുരക്ഷ തുടരും

കൊച്ചി: വിദ്യാര്‍ഥി സംഘടനകള്‍ തമ്മിലുള്ള സംഘര്‍ഷങ്ങള്‍ക്ക് പിന്നാലെ അടച്ച് പൂട്ടിയ എറണാകുളം മഹാരാജാസ് കോളജ് ഇന്ന് തുറക്കും. വിദ്യാര്‍ഥി സംഘടനകുമായി കോളജ് അധികൃതരും, പൊലിസും നടത്തിയ ചര്‍ച്ചയിലാണ് തീരുമാനം. സംഘര്‍ഷ സാധ്യത കണക്കിലെടുത്ത് നിയന്ത്രണങ്ങളോടെയാണ് ക്യാമ്പസ് തുറന്ന് കൊടുക്കുന്നത്. കോളജ് ഉടന്‍ തുറക്കണമെന്ന് പിടിഎ യോഗം നേരത്തെ തീരുമാനിച്ചിരുന്നു.

നിലവില്‍ കുറച്ച് ദിവസത്തേക്ക് കൂടി കാമ്പസില്‍ പൊലിസ് സുരക്ഷ നിലനിര്‍ത്താനാണ് തീരുമാനം. വൈകീട്ട് ആറ് മണിക്ക് തന്നെ കോളജ് ഗേറ്റ് അടയ്ക്കും. അതിന് ശേഷം വിദ്യാര്‍ഥികളെ കാമ്പസില്‍ തുടരാന്‍ അനുവദിക്കില്ല. വിദ്യാര്‍ഥികള്‍ എല്ലാവരും തന്നെ ഐഡി കാര്‍ഡ് ധരിക്കണമെന്നും പ്രിന്‍സിപ്പല്‍ ഇന്‍ ചാര്‍ജ് ഡോ ഷജില ബീവി വ്യക്തമാക്കി. സെക്യൂരിറ്റി ജീവനക്കാരെ നിയമിക്കാന്‍ മുന്‍ പ്രിന്‍സിപ്പല്‍ സര്‍ക്കാരിന് കത്ത് നല്‍കിയിരുന്നുവെന്നും സര്‍ക്കാര്‍ തീരുമാനത്തിന് വേണ്ടി കാത്തിരിക്കുകയാണെന്നും പ്രിന്‍സിപ്പല്‍ മാധ്യമങ്ങളോട് പറഞ്ഞു.

കെഎസ് യു, എസ്എഫ് ഐ, ഫ്രറ്റേണിറ്റി പ്രവര്‍ത്തകള്‍ തമ്മിലുണ്ടായ സംഘര്‍ഷത്തെ തുടര്‍ന്ന് കഴിഞ്ഞ വ്യാഴാഴ്ച്ചയാണ് കോളജും ഹോസ്റ്റലും അനിശ്ചിത കാലത്തേക്ക് അടച്ചത്. സംഘര്‍ഷത്തിനിടെ എസ്എഫ് ഐ യൂണിറ്റ് സെക്രട്ടറി അബ്ദുല്‍ നാസറിന് കുത്തേറ്റിരുന്നു. ബുധനാഴ്ച്ച അര്‍ധരാത്രിയോടെയാണ് സംഭവം. കാമ്പസില്‍ നാടക പരിശീലനം നടക്കുന്നതിനിടെയാണ് സംഘര്‍ഷമുണ്ടായത്.

സംഘര്‍ഷത്തില്‍ കെസ് യു പ്രവര്‍ത്തകന്‍ മുഹമ്മദ് ഇജിലാല്‍, എസ്എഫ് ഐ ജില്ലാ പ്രസിഡന്റ് പ്രജിത് കെ ബാബു, വൈസ് പ്രസിഡന്റ് ആഷിഷ് എസ് ആനന്ദ് തുടങ്ങിയവര്‍ അറസ്റ്റില്‍ ആയിട്ടുണ്ട്.