കരടിപ്പേടിയിൽ വയനാട്; ജനവാസ മേഖലയിലിറങ്ങിയ കരടിയെ പിടികൂടാനുള്ള ശ്രമം ഇന്നും തുടരും

കൽപറ്റ: വയനാട്ടിൽ ജനവാസ മേഖലയിലിറങ്ങിയ കരടിയെ പിടികൂടാനുള്ള ശ്രമം ഇന്നും തുടരും. കരടി ജനവാസ മേഖലയിൽ എത്തിയിട്ട് 65 മണിക്കൂർ കഴിഞ്ഞിട്ടും കരടിക്കായുള്ള തിരച്ചിൽ പുരോഗമിക്കുകയാണ്. മയക്കുവെടിവെച്ച് കരടിയെ പിടികൂടാനുള്ള ശ്രമമാണ് ഇന്ന് നടക്കുക.

ചേരിയംകൊല്ലിയിലെ മങ്കാണിയിലെ വീട്ടുമുറ്റത്താണ് ഒടുവിൽ കരടിയെ കണ്ടത്. കരടിയെ തുരത്താൻ അടുത്ത് കാട് ഇല്ലാത്തത് പ്രതിസന്ധി സൃഷ്ടിക്കുന്നതായി വനംവകുപ്പ് അധികൃതര്‍ പറഞ്ഞു. ഈ സാഹചര്യത്തിലാണ് മയക്കുവെടി വെക്കാനുള്ള ശ്രമത്തിലേക്ക് നീങ്ങുന്നത്. പ്രദേശത്ത് നിലവിൽ നല്ല മഞ്ഞാണ്, അത് മാറിയാൽ ഡാർട്ടിങ് ടീം ഇറങ്ങുമെന്നും അധികൃതര്‍ വ്യക്തമാക്കി.

ഞായറാഴ്ച പുലർച്ചെ 2 മണിയോടെ പയ്യമ്പള്ളിയിൽ കണ്ട കരടി പിന്നീട് തോണിച്ചാൽ, പീച്ചങ്കോട്, തരുവണ കരിങ്ങാരി എന്നീ മേഖലകളിലെത്തി. ഇന്നലെ കരിങ്ങാരിയിലെ നെൽപ്പാടത്തും തോട്ടത്തിലുമായി കരടിയെ കണ്ടു. വനംവകുപ്പ് മയക്കുവെടിക്ക് ശ്രമിച്ചെങ്കിലും ഫലിച്ചില്ല. അവശൻ ആണെങ്കിലും കരടി അതിവേഗം മറ്റൊരിടത്തേക്ക് ഓടി മറയുന്നതാണ് ദൗത്യ സംഘത്തിന് മുന്നിലെ വെല്ലുവിളി.

അതേസമയം, ജനങ്ങൾക്കുള്ള ജാഗ്രതാ നിർദേശം തുടരുകയാണ്. കരടി അതിവേഗം ഓടിപോകുന്നതിനാൽ ജനങ്ങൾ ജാഗ്രത പാലിക്കണം.