ബജാജ് എന്നാല്‍ ഇന്ത്യന്‍ ജനതക്ക് പള്‍സര്‍ എന്നാണ്. 150,180,200,220 സി.സി വേര്‍ഷനുകളിലൊക്കെ ഇന്ത്യന്‍ മാര്‍ക്കറ്റിലേക്കെത്തിയ പള്‍സറിനെ ഇരുകൈകളും നീട്ടിയാണ് ഇന്ത്യന്‍ ജനത സ്വീകരിച്ചത്. ഇന്നും മാര്‍ക്കറ്റില്‍ ബജാജിന്റെ തുറുപ്പ് ചീട്ടായി വിലസുന്ന പള്‍സര്‍ സീരിസിലേക്ക് കാലത്തിന് അനുസൃതമായ ചില മാറ്റങ്ങള്‍ കൊണ്ടുവരാനൊരുങ്ങുകയാണ് ബജാജ് എന്ന റിപ്പോര്‍ട്ടുകളാണിപ്പോള്‍ പുറത്ത് വരുന്നത്.ബജാജ് തങ്ങളുടെ N150, N160 മോഡലുകള്‍ അപ്ഡേറ്റ് ചെയ്ത് പുറത്തിറക്കിരിക്കുകയാണിപ്പോള്‍.

പള്‍സര്‍ NS160, പള്‍സര്‍ NS200 എന്നിവയ്ക്കൊപ്പം USD ഫ്രണ്ട് ഫോര്‍ക്കുകള്‍ വാഗ്ദാനം ചെയ്ത ശേഷം കമ്പനി പള്‍സര്‍ N150, പള്‍സര്‍ N160 എന്നിവയിലേക്ക് പുത്തന്‍ സാങ്കേതിക വിദ്യയിലധിഷ്ഠിതമായ സങ്കേതങ്ങള്‍ കൊണ്ടുവരാനൊരുങ്ങുകയാണ്. ഈ വര്‍ഷം ബജാജ് പള്‍സര്‍ N160, പള്‍സര്‍ N150 മോഡലുകള്‍ക്കായി പൂര്‍ണ ഡിജിറ്റല്‍ ഇന്‍സ്ട്രുമെന്റ് എല്‍സിഡി ക്ലസ്റ്റര്‍ അവതരിപ്പിച്ചിരുന്നു. കൂടാതെ റൈഡ് കണക്ട് ആപ്പിനൊപ്പം ബ്ലൂടൂത്ത് കണക്റ്റിവിറ്റിയും ബൈക്കില്‍ സപ്പോര്‍ട്ട് ചെയ്യുന്നുണ്ട്.

ഇതോടെ ഉപയോക്താക്കള്‍ക്ക് സ്മാര്‍ട്ട്ഫോണിനെ അവരുടെ പ്രിയപ്പെ പള്‍സര്‍ N160, N150 എന്നിവയുമായി കണക്റ്റ് ചെയ്യാന്‍ സാധിക്കും. ഇതിലൂടെ എവിടെയായിരുന്നാലും റൈഡര്‍ക്ക് കോളുകള്‍ സ്വീകരിക്കുകയോ നിരസിക്കുകയോ ചെയ്യാം. കൂടാതെ മൊബൈല്‍ നോട്ടിഫിക്കേഷന്‍ അലേര്‍ട്ടുകള്‍, മൊബൈല്‍ സിഗ്‌നല്‍ ശക്തിയും ബാറ്ററി നില, ഗിയര്‍ പൊസിഷന്‍ ഇന്‍ഡിക്കേറ്റര്‍, ഡിസ്റ്റന്‍സ് ടു എംടി, ലൈവ് മൈലേജ്, അവറേജ് മൈലേജ് എന്നിവയും ആക്സസ് ചെയ്യാനാവും.

ബ്ലാക്ക്, റെഡ്, ബ്ലൂ എന്നീ മൂന്ന് കളര്‍ ഓപ്ഷനുകളില്‍ പുറത്തിറങ്ങുന്ന പള്‍സര്‍ N160 മോഡലിന് ഒന്നര ലക്ഷം രൂപമുതലാണ് എക്‌സ്‌ഷോറൂം വില ആരംഭിക്കുന്നത്.5-സ്പീഡ് ഗിയര്‍ബോ്സുമായി ജോടിയാക്കിയ യൂണിറ്റ് 15.8 bhp കരുത്തില്‍ പരമാവധി 14.65 Nm torque വരെ ഉത്പാദിപ്പിക്കാന്‍ ശേഷിയുള്ള ഈ ബൈക്കിന് ഏകദേശം 45 കിലേമീറ്റര്‍ ഇന്ധനക്ഷമത ലഭിക്കുമെന്നാണ് പ്രതീക്ഷിക്കപ്പെടുന്നത്.

Content Highlights:Bajaj Pulsar N150 Pulsar N160 get digital display