ബിഹാറില്‍ 'കാണാതായ എട്ട് ബി.ജെ.പി- ജെ.ഡി.യു എം.എല്‍.എമാരില്‍ ഏഴു പേര്‍ തിരിച്ചെത്തി, ഒരാള്‍ ഇപ്പോഴും കാണാമറയത്ത്

പട്‌ന: ബിഹാറില്‍ നിതീഷ് കുമാര്‍ സര്‍ക്കാരിന്റെ വിശ്വാസവോട്ട് ഇന്ന്. അതിനിടെ ബി.ജെ.പി പാളയത്തില്‍ നിന്ന് കാണാതായെന്ന് പറഞ്ഞ എട്ട് എം.എല്‍.എമാരില്‍ ഏഴ് പേര്‍ തിരിച്ചെത്തി. അഞ്ച് ജെ.ഡി (യു) എം.എല്‍.എമാരെയും മൂന്നു ബി.ജെ.പി എം.എല്‍.എമാരെയുമാണ് കാണാതായത്. ഇതില്‍ ജെ.ഡി (യു) എം.എല്‍.എമാരും ബി.ജെ.പിയില്‍ നിന്നുള്ള രണ്ടു പേരുമാണ് തിരിച്ചെത്തിയതെന്ന് ഇന്ത്യാടുഡേ റിപ്പോര്‍ട്ട് ചെയ്യുന്നു. ഒരാള്‍ ഇപ്പോളും കാണാമറയത്താണെന്നും റിപ്പോര്‍ട്ടില്‍ പറയുന്നു.

കളി കാണാനിരിക്കുന്നതേയുള്ളുവെന്ന് മുന്‍ ഉപമുഖ്യമന്ത്രിയും ആര്‍.ജെ.ഡി നേതാവുമായ തേജസ്വി യാദവ് നേരത്തെ പറഞ്ഞിരുന്നു. എം.എല്‍.എമാരെ ചാക്കിട്ടുപിടിക്കാന്‍ ഇരുപക്ഷവും സജീവമായി നടത്തുന്നുണ്ടെന്നാണ് വിവരം. ഇതേത്തുടര്‍ന്ന് പാര്‍ട്ടികളെല്ലാം തങ്ങളുടെ എം.എല്‍.എമാരെ റിസോര്‍ട്ടുകളിലും മറ്റും പാര്‍പ്പിച്ചിരിക്കുകയാണ്.

243 അംഗ ബിഹാര്‍ നിയമസഭയില്‍ കേവല ഭൂരിപക്ഷത്തിന് 122 എം.എല്‍.എമാരുടെ പിന്തുണയാണ് വേണ്ടത്. എന്‍.ഡി.എ സഖ്യത്തില്‍ 128 അംഗങ്ങളുണ്ട്. മഹാസഖ്യത്തിന് 114 എം.എല്‍.എമാരുടെ പിന്തുണയാണുള്ളത്.

വിശ്വാസ വോട്ടെടുപ്പിന്റെ ഭാഗമായി നിയമസഭക്കു ചുറ്റും കനത്ത പൊലിസ് കാവല്‍ ഏര്‍പെടുത്തിയിട്ടുണ്ട്.