കെ.കരുണാകരന്റെ പാരമ്പര്യം ഇനി ഉപയോഗിച്ചാല്‍ തങ്ങള്‍ തെരുവില്‍ തടയുമെന്ന കോണ്‍ഗ്രസ് നേതാവ് രാഹുല്‍ മാങ്കൂട്ടത്തിന്റെ പ്രസ്താവനക്കെതിരെ ബിജെപി നേതാവ് പത്മജ വേണുഗോപാല്‍.രാഹുല്‍ ടിവിയിലിരുന്ന് നേതാവായ ആളാണെന്നും അദ്ദേഹം അതു തന്നോട് പറയേണ്ടെന്നുമായിരുന്നു രാഹുലിന്റെ പ്രസ്താവനക്കെതിരെ പത്മജയുടെ മറുപടി.ഡല്‍ഹിയില്‍ ബിജെപി ആസ്ഥാനത്തു പാര്‍ട്ടി അംഗത്വം സ്വീകരിച്ചശേഷം മാധ്യമങ്ങളുടെ ചോദ്യത്തിനു മറുപടിയായിട്ടാണ് പത്മജ ഇക്കാര്യം പറഞ്ഞത്.

കെ.കരുണാകരന്റെ പൈതൃകം പത്മജ ഇനി എവിടെയെങ്കിലും ഉപയോഗിച്ചാല്‍ യൂത്ത് കോണ്‍ഗ്രസുകാര്‍ തെരുവിലിറങ്ങി തടയുമെന്നാണ് രാഹുല്‍ മാങ്കൂട്ടത്തില്‍ രാവിലെ മാധ്യമങ്ങളോടു പറഞ്ഞത്. ''ബയോളജിക്കലി കരുണാകരന്‍ പത്മജയുടെ അച്ഛനാണ്. പൊളിറ്റിക്കലി തന്തയ്ക്ക് പിറക്കാത്ത മകളായി പത്മജ അറിയപ്പെടും. ചരിത്രത്തിലെ ഏറ്റവും വലിയ ഒറ്റുകാരിയായി, ചരിത്രത്തിലെ ഏറ്റവും വലിയ പിതൃഘാതകയായി പത്മജ അറിയപ്പെടും. '' രാഹുല്‍ പറഞ്ഞു.

അതേസമയം, അംഗത്വം സ്വീകരിച്ച ശേഷം മാധ്യമങ്ങളോട് ഏറെനേരം സംസാരിക്കാന്‍ പത്മജയെ ബിജെപി നേതൃത്വം അനുവദിച്ചില്ല. മാധ്യമപ്രവര്‍ത്തകര്‍ക്ക് ചോദിക്കാനുള്ളത് ചോദിക്കാമെന്ന് പത്മജ പറഞ്ഞെങ്കിലും പ്രകാശ് ജാവഡേക്കര്‍ ഉള്‍പ്പെടെയുള്ള നേതാക്കള്‍ പെട്ടെന്ന് എഴുന്നേറ്റ് വാര്‍ത്താസമ്മേളനം അവസാനിച്ചതായി അറിയിക്കുകയായിരുന്നു. പുറത്തേയ്ക്ക് നടക്കുന്നതിനിടെയാണ് പത്മജ പലതിനും മറുപടി നല്‍കിയത്.