തലശ്ശേരി/കൂത്തുപറമ്പ്: വിദ്യാര്‍ഥികളെ ബസില്‍ കയറ്റുന്നതിനെച്ചൊല്ലി സ്വകാര്യ ബസ് തൊഴിലാളികളും വിദ്യാര്‍ഥികളും തമ്മിലുണ്ടായ സംഘര്‍ഷത്തിന്റെ ഭാഗമായി ഇന്നലെയും തലശ്ശേരി- ഇരിട്ടി റൂട്ടില്‍ സ്വകാര്യ ബസ്സുകള്‍ പണിമുടക്കി.
രണ്ടാം ദിവസവും സ്വകാര്യ ബസ്സുകള്‍ മിന്നല്‍ പണിമുടക്ക് നടത്തിയതിനെത്തുടര്‍ന്ന് യാത്രക്കാര്‍ വലഞ്ഞു. കൂത്തുപറമ്പിന് സമീപം പൂക്കോട് വച്ച് ദുര്‍ഗ ബസ്സിലെ ക്ലീനറെ എം.ഇ.എസ് കോളജ് വിദ്യാര്‍ഥികള്‍ മര്‍ദിച്ചതിനെ തുടര്‍ന്നാണ് ഇന്നലെ മിന്നല്‍ പണിമുടക്ക് നടത്താന്‍ തൊഴിലാളികള്‍ തീരുമാനിച്ചത്.ചൊവ്വാഴ്ച  രാവിലെ തലശ്ശേരി പുതിയ ബസ് സ്റ്റാന്‍ഡിലായിരുന്നു സംഭവം.
മറ്റു ബസ് തൊഴിലാളികളും പ്രശ്‌നത്തിലിടപെട്ടുകയും മുഴുവന്‍ ബസ്സുകളും ഓട്ടം നിര്‍ത്തുകയും ചെയ്തു. തുടര്‍ന്ന് പരുക്കേറ്റ ക്ലീനറുടെ മൊഴി പ്രകാരം പൊലിസ് കേസെടുക്കുകയും പത്ത് വിദ്യാര്‍ഥികളെ അറസ്റ്റു ചെയ്തിരുന്നു.
സി.ഐ ഓഫിസില്‍ ബസ് തൊഴിലാളി യൂണിയനുകളുടെയും വിദ്യാര്‍ഥി യൂണിയന്‍പ്രതിനിധികളുടെ സാന്നിധ്യത്തില്‍ നടന്ന ചര്‍ച്ചയെ തുടര്‍ന്ന് വൈകുന്നേരത്തോടെ ബസ്സോട്ടം പുനരാരംഭിച്ചു.