കോട്ടയം
രാജ്യത്തെ ഗവർണർമാരിൽ ഭൂരിഭാഗവും ആർ.എസ്.എസ് പ്രചാരകരെന്ന് സി.പി.എം പോളിറ്റ് ബ്യൂറോ അംഗം എസ്. രാമചന്ദ്രൻ പിള്ള. ഇക്കൂട്ടർ സ്ഥാനത്തും അസ്ഥാനത്തും ഇടപെട്ട് അട്ടിമറിക്ക് ശ്രമിക്കുകയാണ്. സി.പി.എം കോട്ടയം ജില്ലാ സമ്മേളനത്തോട് അനുബന്ധിച്ചുള്ള പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ജമ്മു കശ്മിർ എന്ന സംസ്ഥാനത്തെ ഇല്ലാതാക്കിയരീതി കേന്ദ്രം രാജ്യത്താകെ വ്യാപിപ്പിക്കുന്നു. മുസ് ലിം ഭൂരിപക്ഷം കുറയ്ക്കാൻ മറ്റു മതസ്ഥരെ കശ്മിരിലേക്ക് അയയ്ക്കുകയാണ്. ഇസ്റാഈൽ ഫലസ്തീനോട് ചെയ്യുന്നതിന് സമാനമാണ് കേന്ദ്രം കശ്മിരിനോട് ചെയ്യുന്നത്. ജനാധിപത്യവിരുദ്ധ നടപടികൾക്കൊപ്പം തീവ്ര ഹിന്ദുത്വ നടപടികളും കേന്ദ്രം ശക്തമാക്കുന്നു. ലോകത്തെ ദരിദ്രരുടെ എണ്ണം കുറയ്ക്കാൻ ചൈന ശ്രമിക്കുമ്പോൾ ഇന്ത്യ ദാരിദ്ര്യം വളർത്തുകയാണെന്നും അദ്ദേഹം പറഞ്ഞു.