കോഴിക്കോട്: നിയമസഭാ തെരഞ്ഞെടുപ്പില്‍ കോഴിക്കോട് ജില്ലയില്‍ പുതുമുഖങ്ങളെ രംഗത്തിറക്കാന്‍ സി.പി.എം. ഡി.വൈ.എഫ്.ഐ ദേശീയ പ്രസിഡന്റ് പി.എ മുഹമ്മദ് റിയാസ്, സി.പി.എം ജില്ലാ സെക്രട്ടറി പി.മോഹനന്‍, എസ്.എഫ്.ഐ സംസ്ഥാന സെക്രട്ടറി കെ.എം സച്ചിന്‍ ദേവ് തുടങ്ങിയവരുള്‍പ്പെടെയുള്ളവരെ വിവിധ സീറ്റുകളിലേക്ക് പാര്‍ട്ടി പരിഗണിക്കുന്നുണ്ട്. 

 ബേപ്പൂരില്‍ രണ്ട് ടേം പൂര്‍ത്തിയാക്കിയ സിറ്റിങ് എം.എല്‍.എ വി.കെ.സി മമ്മദ്‌കോയ ഇത്തവണ മത്സരിക്കുന്നില്ലെങ്കില്‍ പി.എ മുഹമ്മദ് റിയാസ്, കണ്‍സ്യൂമര്‍ ഫെഡ് ചെയര്‍മാന്‍ എം.മെഹബൂബ് എന്നിവരുടെ പേരുകളാണ് പരിഗണനയിലുള്ളത്. കോഴിക്കോട് സൗത്തിലും റിയാസിനെ പരിഗണിക്കുന്നുണ്ട്. 2011ലെ സ്ഥാനാര്‍ഥിയും നിലവില്‍ ഡപ്യൂട്ടി മേയറുമായ സി.പി മുസാഫര്‍ അഹമ്മദിനെ സൗത്ത് മണ്ഡലത്തില്‍ നിര്‍ത്തണമെന്ന ചര്‍ച്ചയും പാര്‍ട്ടിയിലുണ്ട്. 

 

കോഴിക്കോട് നോര്‍ത്തില്‍ തുടര്‍ച്ചയായി മൂന്ന് തവണ ജയിച്ച എ.പ്രദീപ്കുമാറിന് വീണ്ടും അവസരം നല്‍കാന്‍ സാധ്യത കുറവാണ്. ജില്ലയില്‍ ഒരു മണ്ഡലത്തില്‍ വനിതയെ മത്സരിപ്പിക്കുന്ന കീഴ്‌വഴക്കം പാലിച്ചാല്‍ ജനാധിപത്യ മഹിളാ അസോസിയേഷന്‍ സംസ്ഥാന സെക്രട്ടറി പി.സതീദേവിക്ക് നറുക്ക് വീഴും. എന്‍.സി.പിയില്‍ നിന്ന് എലത്തൂര്‍ ഏറ്റെടുത്ത് പ്രമുഖ നേതാവിനെ നിര്‍ത്താനുള്ള ചര്‍ച്ചകളും പുരോഗമിക്കുകയാണ്. 

 

സംവരണ മണ്ഡലമായ ബാലുശ്ശേരി സി.പി.ഐയുമായി വച്ചുമാറാന്‍ ചര്‍ച്ചകള്‍ നടക്കുണ്ട്. ഇത് വിജയിച്ചില്ലെങ്കില്‍ ഇവിടെ എസ്.എഫ്.ഐ സംസ്ഥാന സെക്രട്ടറി കെ.എം സച്ചിന്‍ ദേവിനെ മത്സരിപ്പിക്കാനുള്ള ആലോചനയുണ്ട്. തിരുവമ്പാടിയില്‍ സിറ്റിങ് എം.എല്‍.എ ജോര്‍ജ് എം. തോമസും ഇത്തവണ മത്സരിക്കില്ല. ഈ സീറ്റിന് കേരള കോണ്‍ഗ്രസ് (എം) അവകാശവാദം ഉന്നയിച്ചിട്ടുണ്ട്. കേരള കോണ്‍ഗ്രസിന് നല്‍കിയില്ലെങ്കില്‍  ഡി.വൈ.എഫ്.ഐ സംസ്ഥാന ജോ. സെക്രട്ടറി വി.വസീഫ്, സി.പി.എം താമരശ്ശേരി ഏരിയാ കമ്മിറ്റി അംഗം ഗിരീഷ് ജോണ്‍, എസ്.എഫ്.ഐ മുന്‍ ജില്ലാ സെക്രട്ടറിയും കൂടരഞ്ഞി ഗ്രാമപഞ്ചായത്ത് പ്രസിഡന്റുമായ ലിന്റോ ജോസഫ് എന്നിവരില്‍ ഒരാളെ  പരിഗണിക്കും. പേരാമ്പ്രയില്‍ സിറ്റിങ് എം.എല്‍.എ ടി.പി രാമകൃഷ്ണന്‍ മാറിനിന്നാല്‍ ഡി.വൈ.എഫ്.ഐ സംസ്ഥാന ട്രഷറര്‍ എസ്.കെ സജീഷിനെ പരിഗണിച്ചേക്കും. കൊയിലാണ്ടിയില്‍ കെ. ദാസന് ഒരുതവണകൂടി അവസരം നല്‍കിയില്ലെങ്കില്‍ പുതുമുഖം വരും.

കുറ്റ്യാടിയില്‍ ജില്ലാ  സെക്രട്ടേറിയറ്റ് അംഗം കെ.പി കുഞ്ഞഹമ്മദ് കുട്ടി മാസ്റ്ററുടെ പേരിനാണ് മുന്‍തൂക്കം. ബാലുശ്ശേരി സി.പി.ഐക്ക് നല്‍കി നാദാപുരം സി.പി.എം ഏറ്റെടുക്കാനുള്ള ഫോര്‍മുല വിജയിച്ചാല്‍ ഇവിടെ ജില്ലാ സെക്രട്ടറി പി. മോഹനാണ് കൂടുതല്‍ സാധ്യത. മണ്ഡലം ഏതെന്ന കാര്യത്തില്‍ തീരുമാനം വൈകുമെങ്കിലും പി. മോഹനന്‍ മത്സരിക്കുമെന്ന് ഉറപ്പായ സാഹചര്യത്തില്‍ ജില്ലാ സെക്രട്ടറി സ്ഥാനത്തേക്ക് പകരക്കാരന്‍ വരും.