ന്യൂഡൽഹി
മുതിർന്നവരുടെ ഉപയോഗത്തിനുള്ള കൊവിഡ് വാക്‌സിനായ കൊവിഷീൽഡ്, കൊവാക്‌സിൻ പൊതുവിപണിയിൽ ലഭ്യമാക്കുന്നതിന് ഡ്രഗ്‌സ് കൺട്രോളർ ജനറൽ ഓഫ് ഇന്ത്യ ഉപാധികളോടെ അനുമതി നൽകി.
കൊവിഡ് സാഹചര്യത്തിൽ അടിയന്തര ഉപയോഗത്തിനുള്ള അനുമതി മാത്രമാണ് ഇതുവരെയുണ്ടായിരുന്നത്. ഇത് സോപാധിക അനുമതിയായി മാറ്റുകയാണ് ചെയ്തത്. ഇതോടെ സ്വകാര്യ ആശുപത്രികൾക്കും ക്ലിനിക്കുകൾക്കും വാക്‌സിനുകൾ ശേഖരിക്കാം. ഇതു സാധാരണക്കാർക്ക് നൽകാം. എന്നാൽ ഡോക്ടറുടെ കുറിപ്പടിയുണ്ടെങ്കിലും ഇല്ലെങ്കിലും മെഡിക്കൽ സ്റ്റോറുകളിലൂടെ വാക്‌സിൻ വാങ്ങാൻ കഴിയില്ല.

അടിയന്തര സാഹചര്യങ്ങളിൽ നിയന്ത്രിത ഉപയോഗത്തിനുള്ള വാക്‌സിനുകളുടെ അനുമതി എന്ന നിലയിൽനിന്ന് പ്രായപൂർത്തിയായവർക്ക് സോപാധിക അനുമതി എന്ന നിലയിൽ ഉയർത്താൻ സെൻട്രൽ ഡ്രഗ്‌സ് സ്റ്റാൻഡേർഡ് കൺട്രോൾ ഓർഗനൈസേഷന്റെ വിദഗ്ധ സമിതി നേരത്തെ ശുപാർശ ചെയ്തിരുന്നു. ഉപാധി പ്രകാരം വിദേശത്ത് നടന്നുകൊണ്ടിരിക്കുന്ന വാക്‌സിൻ ക്ലിനിക്കൽ പരീക്ഷണങ്ങളുടെ വിവരങ്ങൾ ഇരുവാക്‌സിനുകളും നിർമിക്കുന്ന സ്ഥാപനങ്ങൾ ഡ്രഗ്‌സ് കൺട്രോളർ ജനറൽ ഓഫ് ഇന്ത്യക്ക് നിശ്ചിത സമയത്തിനുള്ളിൽ സമർപ്പിക്കണം. ആശുപത്രികളിൽ ലഭ്യമായ വാക്‌സിൻ വിവരങ്ങൾ കൊവിൻ പോർട്ടലിൽ ലഭ്യമാക്കണം. അതോടൊപ്പം സർക്കാറിന്റെ വാക്‌സിനേഷൻ യജ്ഞത്തിലേക്ക് വാക്‌സിനുകൾ നൽകുന്നതു തുടരണം. വാക്‌സിനേഷനു ശേഷമുള്ള പ്രതികൂല സംഭവങ്ങൾ നിരീക്ഷിക്കുന്നതു തുടരുമെന്നും ഡ്രഗ്‌സ് കൺട്രോളർ ജനറൽ വ്യക്തമാക്കി.
ആശുപത്രികൾക്ക് നിലവിൽ നൽകിക്കൊണ്ടിരിക്കുന്നതിലും കുറഞ്ഞ വിലയ്ക്കാണ് വാക്‌സിനുകൾ നൽകുകയെന്നാണ് സൂചന.