ന്യൂയോർക്ക്
ഇസ്‌റാഈൽ കമ്പനിയായ എൻ.എസ്.ഒയുടെ ചാരസോഫ്റ്റ്‌വെയറായ പെഗാസസ് 2017ൽ ഇന്ത്യ വാങ്ങിയതായി ന്യൂയോർക്ക് ടൈംസ് റിപ്പോർട്ട്. 13,000 കോടി രൂപയുടെ സൈനിക കരാറിൽ ഉൾപ്പെടുത്തിയാണ് സോഫ്റ്റ്‌വെയർ വാങ്ങിയത്. ഇരു രാജ്യങ്ങളും ഒപ്പിട്ട സൈനിക കരാറിലാണ് പെഗാസസ് കൈമാറ്റവും ഉൾപ്പെടുത്തിയത്.

മിസൈൽ സംവിധാനവും പെഗാസസും വാങ്ങുന്നതായിരുന്നു കരാറിലെ പ്രധാന കാര്യങ്ങളെന്ന് ഒരു വർഷം നീണ്ട അന്വേഷണത്തിൽ വ്യക്തമായതായി റിപ്പോർട്ടിൽ പറയുന്നു. 2017ൽ പ്രധാനമന്ത്രി നരേന്ദ്രമോദി ഇസ്‌റാഈൽ സന്ദർശിച്ചിരുന്നു. ഇതോടെയാണ് കരാറിൽ തീരുമാനമായതെന്നും റിപ്പോർട്ട് വ്യക്തമാക്കുന്നു. പെഗാസസ് ചോർത്തലിന് ഇരയായവരുടെ പട്ടിക ദ വയർ നേരത്തെ പുറത്തുവിട്ടിരുന്നു.

ഇസ്‌റാഈൽ സർക്കാരും എൻ.എസ്.ഒ ഗ്രൂപ്പും ചേർന്ന് എതിരാളികളെ നിരീക്ഷിക്കാനുള്ള ഉപകരണമെന്ന നിലയിൽ പെഗാസസ് രാഷ്ട്രത്തലവന്മാർക്ക് നൽകുകയായിരുന്നു.
ഇന്ത്യ, പോളണ്ട്, ഹംഗറി തുടങ്ങിയ രാജ്യങ്ങളിലെല്ലാം ഗുരുതരമായ മനുഷ്യാവകാശ ലംഘനങ്ങൾ നടന്നതിന്റെ രേഖകളുണ്ടെന്നും ന്യൂയോർക്ക് ടൈംസ് റിപ്പോർട്ടിൽ ചൂണ്ടിക്കാട്ടുന്നുണ്ട്.
അതേസമയം, രാജ്യസുരക്ഷയെന്ന ന്യായീകരണത്തോടെ പെഗാസസ് വിഷയത്തിൽനിന്ന് ഒഴിഞ്ഞുമാറുന്ന നിലപാടാണ് കേന്ദ്രസർക്കാർ സ്വീകരിച്ചുവരുന്നത്. എൻ.എസ്.ഒ ഗ്രൂപ്പുമായി ഒരുതരത്തിലുള്ള വാണിജ്യ ഇടപാടും നടത്തിയിട്ടില്ലെന്നു കഴിഞ്ഞ വർഷം പ്രതിരോധ മന്ത്രാലയം പ്രസ്താവനയിറക്കിയിരുന്നു. സർക്കാരിന്റെ ഈ വിശദീകരണം തള്ളുന്നതാണ് ന്യൂയോർക്ക് ടൈംസിന്റെ റിപ്പോർട്ട്.

2019 ജൂണിൽ ഇസ്‌റാഈൽ പ്രധാനമന്ത്രി ഇന്ത്യ സന്ദർശിച്ചു, യു.എൻ സാമ്പത്തിക-സാമൂഹ്യ സമിതിയിൽ ഫലസ്തീൻ മനുഷ്യാവകാശ സംഘടനയ്ക്ക് നിരീക്ഷക പദവി നിഷേധിക്കാൻ ഇന്ത്യ ഇസ്‌റാഈലിനെ പിന്തുണച്ചു വോട്ടുചെയ്തു തുടങ്ങിയ കാര്യങ്ങളും റിപ്പോർട്ടിൽ പറയുന്നു.

എന്നാൽ, ന്യൂയോർക്ക് ടൈംസിനെ ആരെങ്കിലും വിശ്വസിക്കുമോയെന്നായിരുന്നു കേന്ദ്രമന്ത്രിയും മുൻ സൈനിക മേധാവിയുമായ വി.കെ സിങ്ങിന്റെ പ്രതികരണം. അതേസമയം, പെഗാസസ് വിഷയത്തിൽ വീണ്ടും ആരോപണങ്ങളുമായി പ്രതിക്ഷവും രംഗത്തെത്തിയിട്ടുണ്ട്.