സ്വന്തം ലേഖകൻ
കോട്ടയം
എം.ജി സർവകലാശാലയിൽ കൈക്കൂലി കേസിൽ പിടിയിലായ അസിസ്റ്റന്റ് സി.ജെ എൽസിയുടെ നിയമനം സംബന്ധിച്ച് വിശദമായ അന്വേഷണത്തിന് വിജിലൻസ്. കഴിഞ്ഞ ദിവസം ഇതുസംബന്ധിച്ച മുഴുവൻ രേഖകളും ഡിവൈ. എസ്. പി. എ.കെ വിശ്വനാഥന്റെ നേതൃത്വത്തിലുള്ള അന്വേഷണസംഘം സർവകലാശാലയിൽ നിന്നു പിടിച്ചെടുത്തിരുന്നു. പ്യൂൺ തസ്തികയിൽ ഇവർ 2010 ൽ സ്ഥിരപ്പെട്ടതു മുതലുള്ള കാര്യങ്ങളാണ് വിജിലൻസ് അന്വേഷിക്കുന്നത്. എഴുത്തുപരീക്ഷ, അഭിമുഖം എന്നിവ നടത്തി തയാറാക്കിയ 408 പേരുടെ റാങ്ക് ലിസ്റ്റിൽ നിന്നാണ് അന്ന് നിയമനം നടത്തിയതെന്ന സർവകലാശാല അധികൃതരുടെ വാദം ശരിവയ്ക്കുന്ന വിവരങ്ങളാണ് പ്രാഥമിക പരിശോധനയിൽ കണ്ടെത്തിയതെന്ന് ഡിവൈ.എസ്.പി പറഞ്ഞു.

കൈക്കൂലി വിഷയത്തിൽ കൂടുതൽപേർ ഉൾപ്പെട്ടിട്ടുണ്ടോ എന്ന് അന്വേഷിക്കും. പരാതിക്കാരിയുമായുള്ള പ്രതിയുടെ ഫോൺ സംഭാഷണത്തിൽ പറയുന്ന ആളുകളുടെ ഇടപെടൽ സംബന്ധിച്ച മുഴുവൻ കാര്യങ്ങളും പരിശോധിക്കും. ആവശ്യമെങ്കിൽ പരാതിക്കാരിയുടെ മൊഴി വീണ്ടും എടുക്കും. സർവകലാശാല അസിസ്റ്റന്റ് നിയമനത്തിലെ മറ്റ് വിഷയങ്ങൾ ഈ കേസിൽ പ്രസക്തമല്ലെന്നും അദ്ദേഹം പറഞ്ഞു. പരീക്ഷാ ഭവനിലെ ഇവരുടെ ഇടപെടൽ സംബന്ധിച്ചും വിജിലൻസ് അന്വേഷിക്കും. അതേസമയം എൽസി അടക്കമുള്ളവരുടെ 2017 ലെ അസിസ്റ്റന്റ് നിയമനം റദ്ദ് ചെയ്യണമെന്ന ധനകാര്യ പരിശോധനാ വകുപ്പിന്റെ ശുപാർശയിൽ സർവകലാശാല നടപടി സ്വീകരിച്ചില്ലെന്ന വിവരവും പുറത്തുവന്നു. അനധികൃത നിയമനം നേടിയവരെ മടക്കി അയയ്ക്കണമെന്നും തീരുമാനം എടുത്ത സിൻഡിക്കേറ്റ് അംഗങ്ങൾക്കെതിരേ നടപടി വേണമെന്നുമാണ് ധനവകുപ്പ് നിർദേശിച്ചത്. എന്നാൽ ഇത് സർവകലാശാല അവഗണിച്ചു.