ന്യൂഡൽഹി
റഷ്യൻ ആക്രമണം ശക്തമാകുന്ന സാഹചര്യത്തിൽ ഉടൻ ഖാർകീവ് വിടാൻ ഇന്ത്യക്കാരോട് ഉക്രൈനിലെ ഇന്ത്യൻ എംബസി. ഉക്രൈൻ സമയം ഇന്നലെ വൈകിട്ട് ആറ് മണിക്ക് മുമ്പ് ഖാർകീവ് വിട്ട് സാധ്യമായ മാർഗത്തിലൂടെ പെസോച്ചിൻ, ബാബയ്, ബെസ്ലിയുദോവ്ക എന്നിവിടങ്ങളിലേക്കെത്താനാണ് എംബസി ആവശ്യപ്പെട്ടിരിക്കുന്നത്. എംബസിയുടെ അറിയിപ്പിന് പിന്നാലെ ഖാർകീവിൽ നിന്ന് പലായനം ചെയ്യുന്നവരുടെ വലിയ തിരക്ക് അനുഭവപ്പെട്ടു.
ഇന്ത്യൻ വിദ്യാർഥികൾ കൂട്ടത്തോടെ പലായനം ചെയ്യുന്നതിന്റെ വീഡിയോയും പുറത്തുവന്നിട്ടുണ്ട്. പെസോചിനിലേക്ക് വാഹനങ്ങൾ കിട്ടുന്നില്ലെന്നറിയിച്ച വിദ്യാർഥികളോട് നടന്നുപോകാൻ എംബസി നിർദേശിച്ചിട്ടുണ്ട്. ഖാർകീവിൽ ഇനി ആരും തുടരരുതെന്നും എംബസിയുടെ അടിയന്തര മുന്നറിയിപ്പിൽ പറയുന്നു. കഴിഞ്ഞ ദിവസം സമാനമായി കീവ് വിടണമെന്ന നിർദേശം എംബസി നൽകിയിരുന്നു.