ഗൂഡല്ലൂര്‍: ദീര്‍ഘദൂര സര്‍വിസുകളില്‍ ഓടി തളര്‍ന്ന സര്‍ക്കാര്‍ ബസുകളാണ് ഗൂഡല്ലൂര്‍-പന്തല്ലൂര്‍ താലൂക്കുകളില്‍ സര്‍വിസ് നടത്തുന്നതെന്ന് ആരോപണം. കാലപ്പഴക്കം കാരണം മേല്‍ക്കൂര നശിച്ച് ചോര്‍ന്നൊലിക്കുന്ന നിലയിലാണ് മിക്ക ബസുകളും. കോയമ്പത്തൂര്‍, ഈറോഡ് തുടങ്ങിയ ദീര്‍ഘദൂര റൂട്ടുകളില്‍ സര്‍വിസ് നടത്തിയിരുന്ന ബസുകളാണ് മേഖലകളില്‍ നിലവില്‍ സര്‍വിസ് നടത്തുന്നത്.
ചോര്‍ന്നൊലിക്കുന്നതിന് പുറമേ ബസുകളുടെ ജനല്‍ ചില്ലുകളും സീറ്റുകളും തകര്‍ന്ന നിലയിലാണ്. തുരുമ്പെടുത്ത് ഏതു നിമിഷവും തകരാവുന്ന ചവിട്ടുപടികള്‍ അപകട ഭീഷണിയാകുന്നുണ്ട്. വിദ്യാര്‍ഥികളടക്കം ദിനവും നൂറുകണക്കിന് യാത്രക്കാരാണ് സര്‍ക്കാര്‍ ബസുകളെ ആശ്രയിക്കുന്നത്. കഴിഞ്ഞ വര്‍ഷം ബസിലെ തുരുമ്പെടുത്ത തകരത്തില്‍ തട്ടി വിദ്യാര്‍ഥിനിയുടെ കൈക്ക് ഗുരുതര പരുക്കേറ്റിരുന്നു. തുടര്‍ന്ന് വ്യാപക പ്രതിഷേധമുണ്ടായെങ്കിലും ബസുകള്‍ മാറ്റാന്‍ ഇതുവരെ അധികൃതര്‍ തയാറായിട്ടില്ല.