തിരുവനന്തപുരം: കെ റെയില്‍ വിഷയം സഭ ചര്‍ച്ച ചെയ്യണമെന്ന പ്രതിപക്ഷത്തിന്റെ അടിയന്തര പ്രമേയ നോട്ടിസിന് അനുമതി നല്‍കി.

ഇന്ന് ഉച്ചയ്ക്ക് ഒരു മണി മുതലാണ് ചര്‍ച്ച. പ്രതിപക്ഷത്തു നിന്ന് പി സി വിഷ്ണുനാഥാണ് അടിയന്തര പ്രമേയ നോട്ടീസ് നല്‍കിയത്. കെ റെയില്‍ പദ്ധതിക്കെതിരായ പ്രതിഷേധങ്ങളെ സര്‍ക്കാര്‍ അടിച്ചമര്‍ത്തുന്നുവെന്ന് പ്രതിപക്ഷം നിയമസഭയില്‍ പറഞ്ഞു. ബലപ്രയോഗത്തിലൂടെ സമരങ്ങളെ അടിച്ചമര്‍ത്തുകയാണെന്ന് കാണിച്ചാണ് പി സി വിഷ്ണുനാഥ് എംഎല്‍എ അടിയന്തര പ്രമേയത്തിന് നോട്ടീസ് നല്‍കിയത്.

കേരളത്തിന്റെ ഭാവിക്ക് പ്രധാനമാണ് കെ റെയിലെന്ന് മുഖ്യമന്ത്രി പറഞ്ഞു. രണ്ടാം പിണറായി സര്‍ക്കാരിന്റെ ആദ്യ അടിയന്തര പ്രമേയ ചര്‍ച്ചയാണിത്. ധനമന്ത്രി കെ എന്‍ ബാലഗോപാല്‍ അവതരിപ്പിച്ച ബജറ്റിന്മേലുള്ള ചര്‍ച്ചയും സഭയില്‍ ഇന്ന് ആരംഭിക്കും.