തിരുവനന്തപുരം
പൊലിസ് വകുപ്പിൽ കേന്ദ്ര സർക്കാരിന് കീഴിലുള്ള എൻഫോഴ് സ് മെൻ്റ് ഡയറക്ടറേറ്റ് മാതൃകയിൽ സാമ്പത്തിക കുറ്റകൃത്യവിഭാഗം രൂപീകരിക്കുന്നതിനും കെ ഫോൺ പദ്ധതിക്ക് വിവിധ ആനുകൂല്യങ്ങളും ഇളവുകളും നൽകാനും ഇന്നലെ ചേർന്ന മന്ത്രിസഭായോഗം തീരുമാനിച്ചു.
ടെക്നോപാർക്കിന് 8.71 കോടി രൂപയുടെ പദ്ധതി വിഹിത ധനസഹായം അനുവദിക്കും.
ആധുനികവൽക്കരണത്തിന്റെ ഭാഗമായി എക്സൈസ് വകുപ്പിന് 10 വാഹനങ്ങൾ വാങ്ങാനും മന്ത്രിസഭായോഗം അനുമതി നൽകിയിട്ടുണ്ട്. സാമ്പത്തിക കുറ്റകൃത്യങ്ങൾ അന്വേഷിക്കുന്നതിന് ഇക്കണോമിക് ആൻഡ് ഓർഗനൈസ്ഡ് ക്രൈം ഇൻവെസ്റ്റിഗേഷൻവിങ് എന്ന പേരിൽ അന്വേഷണ വിഭാഗത്തിന് രൂപം നൽകാൻ ധനവകുപ്പ് നേരത്തേ അനുമതി നൽകിയിരുന്നു. ഇക്കാര്യം മുഖ്യമന്ത്രി നിയമസഭയിലും അറിയിച്ചിരുന്നു.
ഇതിനു പിന്നാലെയാണ് ഇതുസംബന്ധിച്ച തീരുമാനമെടുത്തത്.
ചതി, സാമ്പത്തിക തട്ടിപ്പുകൾ, പണമിടപാടുകൾ, വിശ്വാസവഞ്ചന, വ്യാജരേഖ ചമയ്ക്കൽ എന്നിങ്ങനെയുള്ള സാമ്പത്തിക കുറ്റകൃത്യങ്ങളിൽ ഈ വിഭാഗത്തിനായിരിക്കും അന്വേഷണച്ചുമതല.
ക്രൈംബ്രാഞ്ചിന്റെ കീഴിൽ രൂപീകരിക്കുന്ന വിഭാഗത്തിനായി 233 തസ്തികകൾ സൃഷ്ടിക്കും. 226 എക്സിക്യൂട്ടീവ് തസ്തികകളും ഏഴ് മിനിസ്റ്റീരിയൽ തസ്തികകളുമാണുണ്ടാകുക. ഒരു ഐജി, നാല് എസ് പി, 11 ഡിവൈ എസ് പി , 19 ഇൻസ്പെക്ടർമാർ, 29 എസ്ഐമാർ, 73 വീതം എസ്‌സിപിഒ, സിപിഒ, 16 ഡ്രൈവർമാർ എന്നിങ്ങനെയാണ് എക്സിക്യൂട്ടീവ് തസ്തികകൾ സൃഷ്ടിക്കുക.
കെ ഫോൺ പദ്ധതിക്കായി സർക്കാരിന് കീഴിലുള്ള വകുപ്പുകൾ, താഴെത്തട്ടിലുള്ള ഓഫിസുകൾ, തദ്ദേശ സ്ഥാപനങ്ങൾ, പൊതുമേഖല സ്ഥാപനങ്ങൾ, മറ്റു സ്ഥാപനങ്ങൾ എന്നിവയിൽനിന്നും റൈറ്റ് ഓഫ് വെ അനുമതി തേടുന്നതാണ് ഒഴിവാക്കുക.
പദ്ധതിക്കായി അടിസ്ഥാന സൗകര്യം ഒരുക്കുന്നതിനായി ഈടാക്കുന്ന വാർഷിക നിരക്കുകൾ, തറവാടക ഉൾപ്പെടെയുള്ള മറ്റു ചാർജുകൾ ഒഴിവാക്കാനും മന്ത്രിസഭായോഗം തീരുമാനിച്ചു.