കണ്ണൂര്‍: വിദ്യാര്‍ഥികളില്‍ ജൈവപച്ചക്കറി ഉല്‍പാദനത്തില്‍ താല്‍പര്യം ഉണ്ടാക്കുന്നതിനു ആകാശവാണിയും നബാര്‍ഡിന്റെ നേതൃത്വത്തിലുള്ള കണ്ണൂര്‍ ഫാം ഫെഡും സംയുക്തമായി നടപ്പാക്കുന്ന റേഡിയോ ഫാം സ്‌കൂള്‍ പദ്ധതി ഇന്ന് ഉച്ചയ്ക്കു രണ്ടിന് കതിരൂര്‍ വൊക്കേഷണല്‍ ഹയര്‍സെക്കന്‍ഡറി സ്‌കൂളില്‍ മന്ത്രി കെ.കെ ശൈലജ ഉദ്ഘാടനം ചെയ്യും. എ.എന്‍ ഷംസീര്‍ എം.എല്‍.എ അധ്യക്ഷനാകും. നബാര്‍ഡ്. ചീഫ് ജനറല്‍ മാനേജര്‍ വി.ആര്‍ രവീന്ദ്രനാഥ് മുഖ്യാതിഥിയാകും. പദ്ധതിയില്‍ ജില്ലയിലെ 250ഓളം ഹൈസ്‌കൂളുകളാണ് ആദ്യഘട്ടത്തില്‍ പങ്കാളികളാകുന്നത്. 10 സെന്റ് സ്ഥലമെങ്കിലും പച്ചക്കറികൃഷിക്കായി കണ്ടെത്തിയ ഹൈസ്‌കൂളുകളിലെ അഞ്ചു വിദ്യാര്‍ഥികളും ഒരു ടീച്ചര്‍ കോഓര്‍ഡിനേറ്ററും ഉള്‍പ്പെടെയുള്ള ടീമിനാണു പദ്ധതി പ്രവര്‍ത്തനങ്ങളുടെ ചുമതല.