ന്യൂഡൽഹി
മലബാർ സമര നായകരെ ഇന്ത്യയുടെ സ്വാതന്ത്ര്യ സമര സേനാനികളുടെ പട്ടികയിൽ നിന്ന് നീക്കം ചെയ്യാനുള്ള ഐ.സി.എച്ച്.ആറിന്റെ തീരുമാനത്തിനെതിരേ മുസ്‌ലിം ലീഗ് എം.പിമാർ ഡൽഹിയിലെ ഗാന്ധി പ്രതിമക്കു മുമ്പിൽ പ്രതിഷേധ സംഗമം നടത്തി. മുസ്‌ലിം ലീഗ് പാർലമെന്ററി പാർട്ടി ലീഡർ ഇ.ടി മുഹമ്മദ് ബഷീർ എം.പി, എം.പിമാരായ പി.വി അബ്ദുൽ വഹാബ്, ഡോ. എം.പി അബ്ദുസമദ് സമദാനി, നവാസ് ഖനി എന്നിവരാണ് പ്രതിഷേധിച്ചത്. രാജ്യത്തിന്റെ സ്വാതന്ത്ര്യ സമര ചരിത്രത്തെ വക്രീകരിക്കുന്ന നിലപാട് അംഗീകരിക്കാനാവില്ലെന്ന് എം.പിമാർ പറഞ്ഞു. ബി.ജെ.പിയുടെ രാഷ്ട്രീയ ലക്ഷ്യങ്ങൾ നടപ്പിലാക്കുന്നതിനു വേണ്ടി ഇന്ത്യയുടെ യഥാർഥ ചരിത്രത്തെ തന്നെ തമസ്‌ക്കരിക്കുകയാണ്. മലബാർ സമരത്തെ വർഗീയവൽക്കരിക്കുന്നതും അവരെ ചരിത്രത്തിൽ തെറ്റായി വ്യാഖ്യാനിക്കുന്നതും രാഷ്ട്രീയ ലക്ഷ്യം കൊണ്ടു മാത്രമാണെന്നും എം.പിമാർ പറഞ്ഞു.