ചവറ (കൊല്ലം)
തെക്കുംഭാഗത്ത് 84 കാരിയായ മാതാവിന് മദ്യലഹരിയിലെത്തിയ മകന്റെ ക്രൂര മർദനം. തെക്കുംഭാഗത്ത് ഓമനയാണ് മർദനത്തിനിരയായത്.
സംഭവത്തിൽ മകൻ തെക്കുംഭാഗം വടക്കുംഭാഗം പരുത്തിക്കൽ കിഴക്കതിൽ വീട്ടിൽ ഓമനകുട്ടനെ (56)വധശ്രമം ഉൾപ്പെടെയുള്ള വകുപ്പുകൾചുമത്തി അറസ്റ്റ്‌ചെയ്തു.
കഴിഞ്ഞ ഞയറാഴ്ചയാണ് ഓമനക്കുട്ടൻ പണം ആവശ്യപ്പെട്ട് മാതാവിനെ മർദിച്ചത്. അയൽവാസിയായ വിദ്യാർഥി ആക്രമണത്തിന്റെ ദൃശ്യങ്ങൾ പകർത്തി സമൂഹമാധ്യമത്തിൽ പങ്കുവച്ചതോടെയാണ് സംഭവം പുറത്തറിഞ്ഞത്.
മാതാവിനെ വലിച്ചിഴക്കുന്നതും ചവിട്ടുന്നതും ദൃശ്യങ്ങളിലുണ്ട്. വലിച്ചിഴക്കുന്നതിനിടെ മാതാവിന്റെ വസ്ത്രങ്ങൾ അഴിഞ്ഞുപോയിട്ടും വീണ്ടും മർദ്ദിക്കുന്നതും ദൃശ്യങ്ങളിൽ വ്യക്തമാണ്. തടയാനെത്തിയ സഹോദരൻ ബാബുവിനും മർദനമേറ്റു. പരുക്കേറ്റ ഓമനയെ അയൽവാസികളാണ് ആശുപത്രിയിൽ എത്തിച്ചത്.
ഓമനയുടെ ശരീരത്തിൽ ഗുരുതരമായി ക്ഷതമേറ്റതിന്റെ പാടുകളുണ്ട്. ദൃശ്യങ്ങൾ ശ്രദ്ധയിൽപ്പെട്ട തെക്കുംഭാഗം പഞ്ചായത്തംഗം വിവരം അറിയിച്ചതുപ്രകാരം പൊലിസെത്തി പ്രതിയെ കസ്റ്റഡിയിലെടുക്കുകയായിരുന്നു.
എന്നാൽ മൊഴി രേഖപ്പെടുത്താനായി പൊലിസെത്തിയപ്പോൾ വീണ് പരുക്കേറ്റതാണെന്നാണ് ഓമന ആദ്യം പറഞ്ഞത്. പിന്നീട് ദൃശ്യങ്ങളെക്കുറിച്ച് ചോദിച്ചപ്പോൾ ഒരു തവണ മാത്രം മർദിച്ചെന്നും തനിക്ക് സംരക്ഷണം നൽകുന്നത് മകനാണെന്നും പരാതിയില്ലന്നും കൂട്ടിച്ചേർത്തു. കൂടുതൽ ചോദ്യംചെയ്തപ്പോഴാണ് മകന്റെ ക്രൂരതയെക്കുറിച്ച് ഓമന വെളിപ്പെടുത്തിയത്.
സംഭവത്തിൽ സംസ്ഥാന മനുഷ്യാവകാശ കമ്മിഷനും കേസെടുത്ത് അന്വേഷണത്തിന് ഉത്തരവിട്ടു. ജില്ലാ പൊലിസ് മേധാവി നടപടികൾ സ്വീകരിച്ച ശേഷം 15 ദിവസത്തിനകം റിപോർട്ട് സമർപ്പിക്കണമെന്ന് കമ്മിഷൻ അംഗം വി.കെ ബീനാകുമാരി ആവശ്യപ്പെട്ടു.