കോട്ടയം: പക്ഷിപ്പനി റിപ്പോര്‍ട്ട് ചെയ്തതിനെ തുടര്‍ന്ന് കോട്ടയം ജില്ലയിലെ മൂന്ന് താലൂക്കുകളില്‍ നിയന്ത്രണം. കോട്ടയം, ചങ്ങനാശ്ശേരി, വൈക്കം താലൂക്കുകളെ പൂര്‍ണമായും നിയന്ത്രണമേഖലയായി പ്രഖ്യാപിച്ചത്. പ്രഭവകേന്ദ്രത്തിന് ഒരു കിലോമീറ്റര്‍ ചുറ്റളവിനുള്ളില്‍ രോഗബാധിത മേഖലയും പത്ത് കിലോമീറ്റര്‍ ചുറ്റളവിനുള്ളില്‍ നിരീക്ഷണ മേഖലയുമാണ്. ഇവിടങ്ങളിലെ ഹാച്ചറികളില്‍ ഡിസംബര്‍ 31 വരെ പക്ഷികളുടെ വളര്‍ത്തല്‍, കൈമാറ്റം, വില്പന എന്നിവ നിരോധിച്ചിട്ടുണ്ട്.

സംസ്ഥാനത്ത് അടിക്കടിയുണ്ടാകുന്ന പക്ഷിപ്പനി പ്രതിരോധിക്കുന്നതിന് ഫാമുകളില്‍ ജൈവസുരക്ഷ ഉറപ്പാക്കാന്‍ സര്‍ക്കാര്‍ നിര്‍ദേശിച്ചു. കേരളത്തില്‍ പക്ഷിപ്പനി പ്രഭവകേന്ദ്രങ്ങള്‍ കൂടുന്നതിനെക്കുറിച്ച് പഠിച്ച് പ്രതിരോധമാര്‍ഗം നിര്‍ദേശിക്കാന്‍ നിയോഗിച്ച വിദഗ്ധ സമിതിയുടെയും പരിശോധന നടത്തിയ ലാബുകളുടെയും റിപ്പോര്‍ട്ടുകള്‍ അടിസ്ഥാനമാക്കിയാണ് നിര്‍ദേശങ്ങള്‍.