വര്‍ക്കല: പാപനാശം ബീച്ചിലെ പാരാഗ്ലൈഡിങ് അപകടത്തില്‍ മൂന്നു പേര്‍ അറസ്റ്റില്‍. ഉത്തരാഖണ്ഡ് സ്വദേശിയായ ഇന്‍സ്ട്രക്ടര്‍ സന്ദീപ് ഉള്‍പ്പെടെ മൂന്ന് പേരെയാണ് അറസ്റ്റ് ചെയ്തത്. മനപ്പൂര്‍വമുള്ള നരഹത്യാശ്രമം അടക്കമുള്ള വകുപ്പുകളാണ് ഇവര്‍ക്കെതിരെ ചുമത്തിയിരിക്കുന്നത്.

അതേസമയം, സ്ഥാപനത്തിന്റെ ഉടമകളായ ആകാശ്, ജിനീഷ് എന്നിവര്‍ ഒളിവിലാണെന്ന് പൊലിസ് അറിയിച്ചു. ഇവരുടെ സ്ഥാപനത്തിന് ലൈസന്‍സില്ലെന്ന് നാട്ടുകാര്‍ ആരോപിച്ചിരുന്നു. എന്നാല്‍ ലൈസന്‍സുണ്ടെന്നാണ് സന്ദീപ് പറയുന്നത്. അതേസമയം, പാപനാശത്ത് പാരാഗ്ലൈഡിങ് നടത്താന്‍ അനുവാദമില്ലെന്നാണ് പൊലിസ് പറയുന്നത്.

ഇന്നലെ നാലരയോടെ കോയമ്പത്തൂര്‍ സ്വദേശി പവിത്രയും ഇന്‍സ്ട്രക്ടറായ സന്ദീപും ഹൈമാസ്റ്റ് ലൈറ്റില്‍ കുടുങ്ങുകയായിരുന്നു. ശക്തമായ കാറ്റില്‍ നിയന്ത്രണം നഷ്ടമായ പാരാ ഗ്ലൈഡിംഗ് സംവിധാനം ഹൈമാസ്റ്റ് ലൈറ്റില്‍ കുരുങ്ങുകയായിരുന്നു. സംഭവത്തിന് പിന്നാലെ വര്‍ക്കല പൊലിസും ഫയര്‍ ഫോഴ്‌സും നാട്ടുകാരും ചേര്‍ന്ന് പ്രത്യേകം തയ്യാറാക്കിയ വലയിലേക്ക് ഇരുവരേയും ഇറക്കി. ഹൈമാസ്റ്റ് ലൈറ്റിന്റെ അഗ്രഭാഗം താഴേക്ക് താഴ്ത്തിയ ശേഷമാണ് താഴേക്ക് ഇറക്കിയത്.

ഏതാണ്ട് ഒന്നേമുക്കാല്‍ മണിക്കൂര്‍ നീണ്ട രക്ഷാപ്രവര്‍ത്തനത്തിനൊടുവിലാണ് ഇവരെ താഴെയിറക്കാനായത്. തുടര്‍ന്ന് ഇരുവരേയും വര്‍ക്കല താലൂക്ക് ആശുപത്രിയിലേക്ക് മാറ്റിയിരുന്നു. എന്നാല്‍ വലിയ പരിക്കില്ലാത്തതിനാല്‍ സന്ദീപിനെ പൊലീസ് കസ്റ്റഡിയിലെടുത്തു.

അതിനിടെ, കേസന്വേഷണം അട്ടിമറിക്കാന്‍ ശ്രമം നടന്നതായി സംശയം ഉയര്‍ന്നിട്ടുണ്ട്. അപകടത്തില്‍ പരിക്കേറ്റ കോയമ്പത്തൂര്‍ സ്വദേശിയായ പവിത്രയില്‍ നിന്ന് പാരാഗ്ലൈഡ് ജീവനക്കാര്‍ സ്റ്റാമ്പ് ഒട്ടിച്ച വെള്ള പേപ്പറില്‍ ഒപ്പിട്ടു വാങ്ങിച്ചിരുന്നു. ആശുപത്രി ജീവനക്കാരിയെന്ന വ്യാജേന എത്തിയാണ് ഒപ്പിട്ടു വാങ്ങിയത്.