തിരുവനന്തപുരം: പാഠ്യേതര വിഷയങ്ങളില്‍ മികവ് തെളിയിച്ച എസ്.എസ്.എല്‍.സി, ഹയര്‍സെക്കന്‍ഡറി വിദ്യാര്‍ഥികള്‍ക്ക് ഇത്തവണ ഗ്രേസ് മാര്‍ക്ക് നല്‍കുമെന്ന് വിദ്യാഭ്യാസ വകുപ്പ് മന്ത്രി വി ശിവന്‍കുട്ടി. ഗ്രേസ് മാര്‍ക്ക് സംവിധാനത്തില്‍ ക്രമീകരണം കൊണ്ടുവരുമെന്ന് മന്ത്രി വ്യക്തമാക്കി. മുന്‍കാല വര്‍ഷങ്ങളില്‍ ഗ്രേസ് മാര്‍ക്ക് ശാസ്ത്രീയമായ രീതിയിലല്ല നല്‍കിയതെന്നും മന്ത്രി അഭിപ്രായപ്പെട്ടു.

കൊവിഡ് കാരണം സംസ്ഥാനത്ത് കഴിഞ്ഞ രണ്ട് അധ്യയന വര്‍ഷങ്ങളില്‍ ഗ്രേസ് മാര്‍ക്ക് നല്‍കിയിരുന്നില്ല. സംസ്ഥാന ദേശീയ അന്തര്‍ദേശീയ തല മത്സരങ്ങളിലെ മികവ്, സ്‌കൗട്ട്‌സ് ആന്‍ഡ് ഗൈഡ്‌സ്, സ്റ്റുഡന്‍സ് പൊലീസ് കേഡറ്റ്, നാഷണല്‍ കേഡറ്റ് കോര്‍പ്‌സ്, ജൂനിയര്‍ റെഡ്‌ക്രോസ്, നാഷണല്‍ സര്‍വീസ് സ്‌കീം എന്നിവയാണ് ഗ്രേസ് മാര്‍ക്കിനായി പരിഗണിക്കുക.

ബ്രഹ്മപുരത്തെ വിദ്യാര്‍ത്ഥികള്‍ക്ക് പരീക്ഷ ആശങ്ക വേണ്ടെന്നും അടിയന്തര സാഹചര്യം നേടിടാന്‍ ആവശ്യമായ ക്രമീകരണം നടപ്പാക്കിയിട്ടുണ്ടെന്നും മന്ത്രി വ്യക്തമാക്കി. ഇതുമായി ബന്ധപ്പെട്ട നിര്‍ദ്ദേശം വിദ്യാഭ്യാസ ഡയറക്ടര്‍ക്ക് നല്‍കിയിട്ടുണ്ടെന്ന് മന്ത്രി അറിയിച്ചു.

സംസ്ഥാനത്തെ പ്ലസ് വണ്‍ സീറ്റുകളില്‍ ജില്ലാ അടിസ്ഥാനത്തില്‍ ആവശ്യമായ ക്രമീകരണം ഒരുക്കിയിട്ടുണ്ടെന്നും മന്ത്രി വ്യക്തമാക്കി. ഏപ്രില്‍ ഒന്ന് മുതല്‍ 26 വരെയാണ് മൂല്യ നിര്‍ണയം. മേയ് രണ്ടാം വാരത്തിലാണ് ഫലം പ്രഖ്യാപിക്കുക.