സ്വന്തം ലേഖകൻ
കാസർകോട്
മഹാകവി മോയിൻകുട്ടി വൈദ്യരുടെ രചനയിലൂടെ പിറവിയെടുത്ത ബദറുൽ മുനീർ-ഹുസുനുൽ ജമാൽ പ്രണയകാവ്യം പുറത്തിറങ്ങിയിട്ട് 150 വർഷം. 1872ൽ തന്റെ ഇരുപതാം വയസിലാണ് മോയിൻകുട്ടി വൈദ്യർ അറബി മലയാളത്തിൽ ബദറുൽ മുനീർ-ഹുസുനുൽ ജമാൽ രചിച്ചത്. അനശ്വര പ്രണയകാവ്യത്തിലൂടെ പുറത്തിറങ്ങിയ 'നാലാം ഇസൽ പൂമകളാണെ ഹുസുനുൽ ജമാൽ പുന്നാരത്താളം മികന്തബീവി...' ഉൾപ്പെടെയുള്ള മാപ്പിളപ്പാട്ടുകൾ പിൽകാലത്ത് മലയാളി മനസിൽ അത്രമേൽ ജനകീയമായി.
മാപ്പിളപ്പാട്ട് ഗായകരായ പീർ മുഹമ്മദ്, വി.എം കുട്ടി, എം.എ അസീസ്, എസ്.എം കോയ എന്നിവർ പാടിയ പ്രണയകാവ്യത്തിൽ നിന്നുള്ള പാട്ടുകളാണ് ഹിറ്റായത്.
അറബി മലയാള ഭാഷയിൽ ഇറങ്ങിയ ആദ്യത്തെ സമ്പൂർണ പ്രണയകാവ്യമാണ് ബദറുൽ മുനീർ-ഹുസുനുൽ ജമാൽ. സൂഫി പാരമ്പര്യമുള്ള പാട്ടാണെന്നും പ്രണയമല്ല, ദൈവത്തിലേക്കുള്ള അടിമയുടെ തേട്ടമാണെന്നുമുള്ള രണ്ടഭിപ്രായം ബദറുൽ മുനീർ-ഹുസുനുൽ ജമാൽ പ്രണയകാവ്യത്തെ കുറിച്ചുണ്ട്.
പേർഷ്യൻ ഭാഷയിൽ ഖാജാ മുയീനുദ്ദീൻ ഷാ ശിരാസി രചിച്ച നോവലാണ് കാവ്യത്തിന് അവലംബമായത്. മലയാളത്തിലെ ലക്ഷണമൊത്ത ആദ്യ നോവലായ ഇന്ദുലേഖ പുറത്തിറങ്ങുന്നതിനും 17 വർഷം മുമ്പാണ് ബദറുൽ മുനീർ-ഹുസുനുൽ ജമാൽ വിഖ്യാത കവിയായ മോയിൻകുട്ടി വൈദ്യർ രചിച്ചത്. ഹിന്ദിലെ അസ്മീർ ദേശത്തെ മഹാരാജാവായ മഹാസീനിന്റെ പുത്രിയായ ഹുസ്‌നുൽ ജമാലും മന്ത്രി മസാമീറിന്റെ പുത്രനായ ബദറുൽ മുനീറും തമ്മിലുള്ള അനശ്വര പ്രണയാണ് മനോഹരമായ കാവ്യമാക്കിയത്.

പ്രണയ കാവ്യത്തിന്റെ കഥയിങ്ങനെ

മന്ത്രി പുത്രന് മകളോടുള്ള പ്രണയമറിഞ്ഞ് രാജാവ് അവനോട് കൊട്ടാരത്തിൽ പ്രവേശിക്കരുതെന്നു കൽപ്പിക്കുന്നു. എന്നാൽ, ഇരുവരും കൊട്ടാരത്തിലെ ഒരു അടിമയുടെ സഹായത്തോടെ രഹസ്യമായി നാടുവിടാൻ തീരുമാനിച്ചു. അബുസയ്യാദ് എന്ന മത്സ്യത്തൊഴിലാളി ഇതറിയുകയും വിവരം മന്ത്രിയെ ധരിപ്പിച്ച് മുനീറിനെ പൂട്ടിയിടുകയും ചെയ്യുന്നു. അബുസയ്യാദ് രാത്രി വേഷംമാറി കുതിരപ്പുറത്തെത്തി ഹുസ്‌നുൽ ജമാലിനെയും കൂട്ടി നാടുവിട്ടു. അടുത്ത പ്രഭാതത്തിലാണ് കബളിപ്പിക്കപ്പെട്ട വിവരം രാജകുമാരി അറിയുന്നത്. അബുസയ്യാദിനൊപ്പം ബഹ്ജർ രാജാവിന്റെ നാട്ടിൽ ഹുസുനുൽ ജമാൽ എത്തുന്നു.

അവളെ വിവാഹം കഴിക്കാൻ രാജാവ് ആഗ്രഹിച്ചു. നിരസിച്ചപ്പോൾ സൈനികരെ അയച്ചെങ്കിലും ഹുസുനുൽ ജമാൽ അവരെ തുരത്തിയോടിച്ചു. അങ്ങനെ കൊട്ടാരത്തിലെത്തിയ അവളെക്കണ്ട് രാജാവ് ഭയന്ന് സിംഹാസനത്തിൽ ഇറങ്ങിയോടുന്നു. ക്ഷീണം കാരണം കൊട്ടാരത്തിലെ പൂന്തോട്ടത്തിൽ ഉറങ്ങിപ്പോയ ഹുസുനുൽ ജമാലിനെ ജിന്നുകളുടെ രാജകുമാരനായ മുഷ്താഖ് പിടികൂടി കൊട്ടരത്തിലെത്തിച്ചു.

മുഷ്താഖിന്റെ പ്രലോഭനങ്ങളെ അതിജീവിച്ച് മുനീറിനോടുള്ള പ്രണയം നിലനിർത്തി അവൾ അവിടെ കഴിയുന്നു. അതേസമയം, പ്രിയതമയെ കാണാതെ വീടുവിട്ടിറങ്ങിയ മുനീർ ആറു മാസക്കാലത്തെ അലച്ചിലിനൊടുവിൽ മലമുകളിലുള്ള ശദാദ് എന്ന ഭൂതരാജാവിന്റെ കൊട്ടാരത്തിലെത്തി. പലതരം പരീക്ഷണങ്ങൾ അതിജീവിച്ചു.
ഒടുവിൽ ഹുസ്‌നുൽ ജമാഅലിന്റെ സംരക്ഷകനായ മുഷ്താഖ് തന്നെ ഇരുവരെയും ഒന്നിപ്പിച്ചു. അസ്മീറിൽ തിരിച്ചെത്തിയ ഇരുവരും വിവാഹിതരാകുന്നു. മഹാസീൻ രാജാവ് സിംഹാസനം ബദറുൽ മുനീറിന് കൈമാറുന്നതോടെ കാവ്യം അവസാനിക്കുന്നു.