സ്വന്തം ലേഖകന്‍
തിരുവനന്തപുരം: ദരിദ്ര ജനവിഭാഗങ്ങള്‍ക്ക് കൈത്താങ്ങായി രണ്ടാം പിണറായി സര്‍ക്കാര്‍. അതിദാരിദ്ര്യം അടുത്ത അഞ്ചുവര്‍ഷംകൊണ്ട് ഉന്മൂലനം ചെയ്യാന്‍ ആദ്യ മന്ത്രിസഭായോഗം തീരുമാനിച്ചു.

അതാതു തദ്ദേശസ്വയംഭരണ സ്ഥാപനങ്ങളില്‍ വിശദമായ സര്‍വേ നടത്തി ക്ലേശഘടകങ്ങള്‍ നിര്‍ണയിക്കാനും അതു ലഘൂകരിക്കാനുള്ള നിര്‍ദേശങ്ങള്‍ സമര്‍പ്പിക്കാനും തദ്ദേശ സ്വയംഭരണ വകുപ്പ് സെക്രട്ടറിമാരെ ചുമതലപ്പെടുത്തി. അഗതിയായ ഓരോ വ്യക്തിയെയും ദാരിദ്ര്യത്തില്‍ കഴിയുന്ന ഓരോ കുടുംബത്തെയും കണ്ടെത്തി പ്രാദേശികവും ഗാര്‍ഹികവുമായ പദ്ധതികളിലൂടെ ദാരിദ്ര്യരേഖയ്ക്കു മുകളില്‍ കൊണ്ടുവരാനാണ് തീരുമാനം.
കിടപ്പാടം നഷ്ടപ്പെടുത്തുന്ന ജപ്തിക്കെതിരേ നിയമമുണ്ടാക്കും. ധനകാര്യ അഡീഷണല്‍ ചീഫ് സെക്രട്ടറി, ആസൂത്രണകാര്യ അഡീഷണല്‍ ചീഫ് സെക്രട്ടറി, വിദഗ്ധ അഭിഭാഷകന്‍ എന്നിവരടങ്ങുന്ന സമിതിയെ ഇതുസംബന്ധിച്ച കാര്യങ്ങള്‍ പരിശോധിച്ച് ജൂലൈ 15നകം റിപ്പോര്‍ട്ട് നല്‍കാന്‍ ചുമതലപ്പെടുത്തി. ആ റിപ്പോര്‍ട്ട് പരിശോധിച്ചാകും തുടര്‍നടപടികള്‍.

വീട്ടമ്മമാരുടെ ജോലിഭാരം ലഘൂകരിക്കുന്ന, വീട്ടുജോലിയെടുക്കുന്നവരെ സംരക്ഷിക്കുന്ന പദ്ധതിക്കു രൂപം നല്‍കാന്‍ ചീഫ് സെക്രട്ടറി, തദ്ദേശ സ്വയംഭരണ സെക്രട്ടറി, വനിതാ- ശിശുക്ഷേമ സെക്രട്ടറി എന്നിവരെ ചുമതലപ്പെടുത്തി. 20 ലക്ഷം അഭ്യസ്തവിദ്യര്‍ക്ക് തൊഴില്‍ നല്‍കാനുള്ള കെഡിസ്‌ക് മാര്‍ഗരേഖ പരിശോധിച്ച് ജൂലൈ 15നകം റിപ്പോര്‍ട്ട് നല്‍കാന്‍ കെഡിസ്‌കിനെ ചുമതലപ്പെടുത്തി. സര്‍ക്കാര്‍ സേവനങ്ങള്‍ ഓണ്‍ലൈനായി വീട്ടുപടിക്കലെത്തുന്ന ബൃഹത്തായ പദ്ധതിക്ക് തുടക്കംകുറിക്കും. ഗാന്ധിജയന്തി ദിനത്തില്‍ ഈ പദ്ധതി നിലവില്‍ വരും. ഐ.ടി സെക്രട്ടറി, ഐ.ടി വിദഗ്ധര്‍ എന്നിവരടങ്ങിയ സമിതി പദ്ധതിക്ക് അന്തിമരൂപം നല്‍കും. ഇതിനായി ഇ-ഓഫീസ്, ഇ-ഫയല്‍ സംവിധാനങ്ങള്‍ കൂടുതല്‍ വിപുലമായി നടപ്പാക്കും. ഇതുസംബന്ധിച്ച് പദ്ധതി നടപ്പാക്കാനാണ് സമിതി.
വ്യവസായം തുടങ്ങുന്നതുമായി ബന്ധപ്പെട്ട പരാതി പരിഹാരത്തിനുള്ള ഏകജാലക സംവിധാനം കൊണ്ടുവരും. ഗ്രീവന്‍സ് റിഡ്രസല്‍ കമ്മിറ്റി നിയമപരമായി പ്രാബല്യത്തില്‍ കൊണ്ടുവരും. ഒരു ഉന്നത ഐ.എ.എസ് ഉദ്യോഗസ്ഥനായിരിക്കും സമിതിയുടെ ചുമതല. ഇതിനായി പ്രത്യേക നിയമനിര്‍മാണം നടത്തും. ഈ നിയമത്തിന്റെ കരട് പരിശോധിക്കാന്‍ ഉദ്യോഗസ്ഥതല സമിതിയെ ചുമതലപ്പെടുത്തി.