ഭോപ്പല്‍: ഇന്ത്യയിലെത്തിച്ച എട്ട് ചീറ്റപ്പുലികളില്‍ ഒന്ന് ചത്തു. സാഷ എന്നു പേരുള്ള പെണ്‍പുലിയാണ് ചത്തത്. നമീബിയയില്‍ നിന്ന് എത്തിച്ച ചീറ്റപ്പുലിയാണ് ചത്തത്. വൃക്കകൾക്ക് തകരാർ സംഭവിച്ചതിനെ തുടർന്നാണ് മരണം.

സാഷയുടെ ജീവന്‍ രക്ഷിക്കാന്‍ വെറ്ററിനറി ഡോക്ടര്‍മാരടക്കമുള്ള വിദഗ്ധര്‍ ശ്രമം നടത്തിയെങ്കിലും ജീവൻ രക്ഷിക്കാനായില്ല. മധ്യപ്രദേശിലെ കുനോ ദേശീയ പാര്‍ക്കിലായിരുന്നു ഇവയെ പാര്‍പ്പിച്ചിരുന്നത്.

ഇന്ത്യയിലേക്ക് കൊണ്ടു വരും മുന്‍പ് തന്നെ സാഷയുടെ വൃക്കകള്‍ക്ക് തകരാറുണ്ടായിരുന്നുവെന്ന് അധികൃതര്‍ വ്യക്തമാക്കി. ഇന്ത്യയില്‍ ചീറ്റപ്പുലികളുടെ എണ്ണം പുനരുജ്ജീവിപ്പിക്കുക ലക്ഷ്യമിട്ടാണ് ചീറ്റകളെ എത്തിച്ചത്.