ന്യൂഡല്‍ഹി: മോദിയുടെ കോട്ട് ഗിന്നസ് ബുക്കില്‍. 4.31 കോടി രൂപയ്ക്കാണ് മോദിയുടെ പേര് പതിച്ച ബന്ധ്ഗാലാ സ്യൂട്ട് ലേലത്തിനു പോയത്. വില്‍ക്കപ്പെട്ട ഏറ്റവും വിലകൂടിയ സ്യൂട്ട് എന്ന റെക്കോഡാണ് മോദിയുടെ സ്യൂട്ടിന് ലഭിച്ചിരിക്കുന്നത്.
പ്രധാനമന്ത്രി പദവിയില്‍ തുടരുന്ന വ്യക്തിക്ക് സമ്മാനിക്കപ്പെട്ട ഒരു വസ്തു ഇത്രയും ഉയര്‍ന്ന വിലയില്‍ ലേലത്തില്‍ പോവുന്നത് ആദ്യമായാണ്. സൂറത്ത് ആസ്ഥാനമായി ബിസിനസ് നടത്തുന്ന 62 കാരനായ ലാല്‍ജി ഭായ് പട്ടേലാണ് മോദിയുടെ കോട്ട് സ്വന്തമാക്കിയത്. ഈ സ്യൂട്ടിന്റെ പേരില്‍ മോദി നേരത്തെ  വിമര്‍ശനങ്ങള്‍ നേരിട്ടിരുന്നു. 'നരേന്ദ്രദാമോദര്‍ ദാസ് മോദി' എന്ന പേര് സ്വര്‍ണ നിറങ്ങളില്‍ പതിപ്പിച്ചിരിക്കുന്ന ഈ നേവി ബ്ലൂ സ്യൂട്ട് ധരിച്ചാണ് മോദി  ഇക്കഴിഞ്ഞ ജനുവരി 25ന് യു.എസ് പ്രസിഡന്റ് ബരാക് ഒബാമയുമായി ന്യൂഡല്‍ഹിയില്‍ കൂടിക്കാഴ്ച നടത്തിയത്. ഗംഗാ ശുദ്ധീകരണത്തിനായി പ്രധാനമന്ത്രി നടത്തുന്ന ക്യാംപയിനിനുവേണ്ടിയാണ് കോട്ട് ലേലം ചെയ്തത്.