ആലപ്പുഴ: പൊലിസ് ക്വാര്‍ട്ടേഴ്‌സില്‍ ആത്മഹത്യ ചെയ്ത നജ്‌ലയുടെ ഭര്‍ത്താവ് റെനീസിന് വട്ടിപ്പലിശയുടെ ഇടപാടും. ഇത് സംബന്ധിച്ച രേഖകളും പണവും റെനീസിന്റെ ബന്ധുവിന്റെ വീട്ടില്‍ നിന്നാണ് പൊലിസ് പിടിച്ചെടുത്തത്. ഇയാള്‍ വട്ടിപ്പലിശക്ക് വായ്പ നല്‍കിയതിന്റെ നിരവധി തെളിവുകളാണ് പൊലിസ് പിടിച്ചെടുത്തത്.

വട്ടിപ്പലിശക്ക് വായ്പ കൊടുക്കുന്നതിനായാണ് നജ്‌ലയെ കൂടുതല്‍ സ്ത്രീധനം ചോദിച്ച് റെനീസ് പീഡിപ്പിച്ചതെന്നും പൊലിസ് പറയുന്നു. ഇയാള്‍ ഇപ്പോള്‍ ജുഡിഷ്യല്‍ കസ്റ്റഡിയില്‍ ജയിലിലാണ്.

ഇയാളുടെ ഭാര്യ നജ്‌ലയും കുഞ്ഞുങ്ങളും മരിച്ചതിന് പിന്നാലെ ബന്ധു വീട്ടില്‍ റെനീസ് ഏല്‍പ്പിച്ചിരുന്ന ബാഗിലാണ്
നിരവധി ആധാരങ്ങളും ചെക്ക് ബുക്കുകളും പണവും കണ്ടെടുത്തത്. ഒരു ലക്ഷത്തിനടുത്ത് നോട്ടുകളും ബാഗിലുണ്ടായിരുന്നു.വട്ടിപ്പലിശ ബിസിനസ് നടത്തിയതിനും റെനീസിനെതിരെ കേസെടുക്കും.

നജ്‌ലയുടെ മരണത്തിന് പിന്നാലെ റെനീസിനെ അന്വേഷണ വിധേയമായി സസ്‌പെന്‍ഡ് ചെയ്തിരുന്നു. വകുപ്പുതല അന്വേഷണവും റെനീസിനെതിരെ പ്രഖ്യാപിച്ചിട്ടുണ്ട്. സ്ത്രീപീഡനം, ആത്മഹത്യാ പ്രേരണ കുറ്റങ്ങള്‍ ചുമത്തിയാണ് റെനീസിനെ അറസ്റ്റ് ചെയ്തിട്ടുള്ളത്.