ക്വാലാലംപൂര്‍: മലേഷ്യയിലെ വിവാദ ഗായകന്‍ ഇസ്‌ലാമിനെ അവഹേളിച്ച കേസില്‍ അറസ്റ്റില്‍. നെയിംവീ എന്ന വീ മെങ് ചീ (33) ആണ് ഞായറാഴ്ച അറസ്റ്റിലായത്. കഴിഞ്ഞ ജൂലൈയില്‍ പുറത്തിറക്കിയ ഓ മൈ ഗോഡ് എന്ന മ്യൂസിക് ആല്‍ബത്തിലാണ് ഇസ്‌ലാംവിരുദ്ധ പരാമര്‍ശങ്ങളുള്ളത്. ഇതിനെതിരേ നല്‍കിയ പരാതിയെ തുടര്‍ന്നാണ് അറസ്റ്റ്. നെയിംവീ രാജ്യത്തെ മതസൗഹാര്‍ദം തകര്‍ക്കാന്‍ ശ്രമിച്ചുവെന്നാണ് പൊലിസ് പറയുന്നത്.

കോടതിയില്‍ ഹാജരാക്കിയ പ്രതിയെ നാലു ദിവസത്തേക്ക് അന്വേഷണസംഘത്തിന്റെ കസ്റ്റഡിയില്‍ വിട്ടു. രണ്ടു വര്‍ഷം വരെ ജയില്‍ശിക്ഷ ലഭിക്കാവുന്ന കുറ്റമാണ് ഗായകനെതിരേ ചുമത്തിയത്. മലേഷ്യയിലെ ജനസംഖ്യയില്‍ മൂന്നില്‍ രണ്ടും മുസ്‌ലിംകളാണ്. ഓഗസ്റ്റ് 20ന് വീഡിയോ ആല്‍ബത്തിന്റെ പുതിയ പതിപ്പ് യൂട്യൂബില്‍ അപ്‌ലോഡ് ചെയ്തതോടെയാണ് വിവാദം ഉടലെടുത്തത്. 20 എന്‍.ജി.ഒകളും പത്തിലേറെ റിപ്പോര്‍ട്ടുകള്‍ ആല്‍ബത്തെ കുറിച്ച് പൊലിസിനു നല്‍കിയിരുന്നു.