കല്‍പ്പറ്റ: ഓണ്‍ലൈനില്‍ മദ്യം നല്‍കാനുള്ള തീരുമാനത്തില്‍ ഗാന്ധിദര്‍ശന്‍ വേദി ജില്ലാ കമ്മിറ്റി പ്രതിഷേധിച്ചു. അരിയും പഞ്ചസാരയും പോലെ മദ്യം അവശ്യ സാധനമാണോയെന്ന് സര്‍ക്കാര്‍ വ്യക്തമാക്കണം.
 വയനാട്ടിലെ വിദേശമദ്യശാലയ്ക്കു മുന്‍പില്‍ ക്യൂ നില്‍ക്കുന്നവരില്‍ ഭൂരിപക്ഷവും ആദിവാസികളും സാധരണക്കാരുമാണ്. ഇവര്‍ക്ക് ഓണ്‍ലൈന്‍ മദ്യം വാങ്ങാനുള്ള സാഹചര്യമില്ല. കോളനികളിലെ ദുരിതത്തിനിടയിലും മദ്യം കഴിക്കുന്നവരെ നിരുത്സാഹപ്പെടുത്താന്‍ ആറുമാസത്തില്‍ അധികമായി മാനന്തവാടിയിലെ വിദേശ മദ്യഷാപ്പിനു മുന്‍പില്‍ സമരം ചെയ്യുന്നവരെ സര്‍ക്കാര്‍ കണ്ടില്ലെന്നു നടിക്കരുത്.
ഇടതു സര്‍ക്കാരും മദ്യമാഫിയയും തമ്മിലുള്ള ധാരണയാണ് ഇപ്പോഴത്തെ നീക്കത്തിനു പിന്നിലെന്നു സംശയിക്കേണ്ടിയിരിക്കുന്നെന്നും യോഗം ആരോപിച്ചു. ജില്ലാ പ്രസിഡന്റ് ഫാ. മാത്യു കാട്ടറാത്ത് അധ്യക്ഷനായി. മംഗലശ്ശേരി മാധവന്‍, ഇ ശ്രീധരന്‍, പി.എ ജെയിംസ്, എം.പി ചന്ദ്രശേഖരന്‍, എം.സി വിന്‍സെന്റ്, ജോര്‍ജ് പാങ്കോട്ട് സംസാരിച്ചു.