മനില: ഫിലിപ്പൈന്‍സില്‍ പ്രസിഡന്റ് റോഡ്രിഗോ ഡുട്രേറ്റ് അധികാരമേറ്റശേഷം നടന്ന മയക്കുമരുന്ന് വിരുദ്ധ കാംപയിനിനിടെ 1,900 പേര്‍ കൊല്ലപ്പെട്ടതായി പൊലിസ്. ഏഴ് ആഴ്ച മുമ്പാണ് ഡുട്രേറ്റ് അധികാരമേറ്റത്. ചില ദിവസങ്ങളില്‍ 36 പേര്‍ വരെ ഇത്തരത്തില്‍ കൊല്ലപ്പെട്ടതായി ദേശീയ പൊലിസ് മേധാവി പറഞ്ഞു.
മയക്കുമരുന്ന് ഉപയോഗിക്കുന്നവരെ കൊന്നൊടുക്കാന്‍ നയമില്ലെന്ന് പൊലിസ് മേധാവി ഡയറക്ടര്‍ ജനറല്‍ റൊണാള്‍ഡ് ദെലാ റോസ സെനറ്റിനെ അറിയിച്ചു. 1,100 പേരുടെ മരണത്തെ കുറിച്ച് അന്വേഷണം പുരോഗമിക്കുകയാണെന്നും അദ്ദേഹം പറഞ്ഞു. പൊലിസിന്റെ മയക്കുമരുന്നുവിരുദ്ധ ഓപറേഷനില്‍ 750 പേര്‍ കൊല്ലപ്പെട്ടതായും അദ്ദേഹം പറഞ്ഞു. 40 പേര്‍ കൊല്ലപ്പെട്ടത് പിടിച്ചുപറിക്കിടെയാണ്. എല്ലാ മരണങ്ങളും മയക്കുമരുന്ന് ഉപയോഗവുമായി ബന്ധപ്പെട്ടതല്ല. രാജ്യത്ത് നിരവധിപേര്‍ കൊല്ലപ്പെട്ടതിനെ തുടര്‍ന്നാണ് സെനറ്റ് മുതിര്‍ന്ന പൊലിസ് ഉദ്യോഗസ്ഥരെ വിളിച്ചുവരുത്തി വിശദീകരണം തേടിയത്.