ഈ ഓട്ടോയില്‍ കയറിയാല്‍ 1 കിലോ തക്കാളി സൗജന്യം,

പച്ചക്കറിയുടെ വില കുതിച്ചുയരുകയാണ്. നൂറില്‍ നിന്നിറങ്ങാതെ തക്കാളി വില അങ്ങനെ തന്നെ നില്‍പ്പുണ്ട്. അതുകൊണ്ട് തന്നെ ആളുകള്‍ തക്കാളി വാങ്ങുന്നതില്‍ നല്ല പിശുക്ക് കാണിക്കുന്നുണ്ട്. എന്നാല്‍ വേറിട്ട ഓഫര്‍ മുന്നോട്ടുവച്ചിരിക്കുകയാണ് ചണ്ഡീഗഢിലുള്ള ഓട്ടോ ഡ്രൈവര്‍ അനില്‍ കുമാര്‍. തക്കാളി വിലയുടെ വര്‍ധനവിനിടെ അത് ആയുധമാക്കി കിടിലന്‍ ഓഫറാണ് ഓട്ടോ ഡ്രൈവര്‍ യാത്രക്കാര്‍ക്ക് നല്‍കുന്നത്. അഞ്ച് തവണ തന്റെ ഓട്ടോറിക്ഷയില്‍ യാത്ര നടത്തുന്നവര്‍ക്ക് തക്കാളി സൗജന്യമായി നല്‍കുമെന്നായിരുന്നു ഓട്ടോ ഡ്രൈവറുടെ ഓഫര്‍. ഒരു കിലോ തക്കാളിയാണ് സൗജന്യമായി നല്‍കുക.

അതേസമയം ഓട്ടോ ഓടിച്ചാണ് വരുമാനം കണ്ടെത്തുന്നതെന്നും, ഇത്തരം വ്യത്യസ്തമായ സേവനങ്ങളും ഓഫറുകളും നല്‍കുന്നത് തനിക്ക് വലിയ സംതൃപ്തി നല്‍കുന്നുവെന്നും അനില്‍ അനില്‍ പറയുന്നു.

തക്കാളി നല്‍കിയത് മാത്രമല്ല അനിലിന്റെ വ്യത്യസ്തതകള്‍. കഴിഞ്ഞ 12 വര്‍ഷമായി അദ്ദേഹം സൈനികര്‍ക്കും, ആശുപത്രികളിലേക്ക് പോകുന്ന ഗര്‍ഭിണികള്‍ക്കും സൗജന്യ സവാരി നല്‍കിവരുന്നുണ്ട്. ഒക്ടോബറില്‍ ഗുജറാത്തില്‍ പാകിസ്ഥാനുമായി നടക്കാനിരിക്കുന്ന ക്രിക്കറ്റ് മത്സരത്തില്‍ ഇന്ത്യ വിജയിച്ചാല്‍ പ്രദേശത്ത് അഞ്ച് ദിവസത്തെ സൗജന്യ ഓട്ടോ സവാരിയും അദ്ദേഹം പ്രഖ്യാപിച്ചിട്ടുണ്ട്.

തക്കാളി വില 100ന് മുകളിലായി തന്നെ തുടരുകയാണ്. വില പരിധി വിട്ടതോടെ വലിയ ശതമാനം ആളുകള്‍ തക്കാളി ഉപയോഗം തന്നെ നിര്‍ത്തി എന്ന് വ്യക്തമാക്കുന്ന സര്‍വേ റിപ്പോര്‍ട്ടുകളടക്കം പുറത്തുവരികയും ചെയ്തിട്ടുണ്ട്.