.

ഡ്രോണ്‍ റിസര്‍ച് സെന്റര്‍ സ്ഥാപിക്കും
വാഹനം ഓടിക്കുന്നതിനിടെ ബ്ലൂടൂത്ത്, ഹാന്‍ഡ് ഫ്രീ ഡിവൈസുകള്‍ ഉപയോഗിച്ച് സംസാരിക്കുന്നത് കുറ്റകരം
തിരുവനന്തപുരം: ഗാര്‍ഹികപീഡന കേസുകളില്‍ കര്‍ശന നടപടി സ്വീകരിക്കുമെന്ന് സംസ്ഥാന പൊലിസ് മേധാവി വൈ.അനില്‍കാന്ത്. കെട്ടികിടക്കുന്ന കേസുകളുടെ കുറ്റപത്രം വേഗത്തില്‍ കോടതിയില്‍ സമര്‍പ്പിക്കുമെന്നും അദ്ദേഹം പറഞ്ഞു. സ്ത്രീകളുടേയും കുട്ടികളുടെയും സുരക്ഷയ്ക്കായിരിക്കും മുന്‍ഗണന. ജനമൈത്രി പൊലിസിങും വനിതാ സെല്ലിന്റെ പ്രവര്‍ത്തനങ്ങളും ശക്തിപ്പെടുത്തും. കേസുകള്‍ അന്വേഷിക്കുന്നതില്‍ ലോക്കല്‍ പൊലിസിന്റെ കാര്യക്ഷമത വര്‍ധിപ്പിക്കും. ആധുനിക സാങ്കേതിക വിദ്യയുടെ ഉപയോഗം പ്രോത്സാഹിപ്പിക്കുമെന്നും അദ്ദേഹം പറഞ്ഞു.

വാഹനം ഓടിക്കുന്നതിനിടെ ബ്ലൂടൂത്ത്, ഹാന്‍ഡ് ഫ്രീ ഡിവൈസുകള്‍ ഉപയോഗിച്ച് സംസാരിക്കുന്നത് കുറ്റകരമാണെന്നും ഡി.ജി.പി പറഞ്ഞു. രാജ്യത്ത് ഡ്രോണ്‍ ആക്രമണങ്ങള്‍ വര്‍ധിക്കുന്ന സാഹചര്യത്തില്‍ സൈബര്‍ ഡോമിന്റെ സഹകരണത്തോടെ ഡ്രോണ്‍ റിസര്‍ച് സെന്റര്‍ തലസ്ഥാനത്ത് ആരംഭിക്കും. കേന്ദ്രവുമായും ഇക്കാര്യത്തില്‍ സഹകരിച്ചുപ്രവര്‍ത്തിക്കും. പൊലിസിലെ ക്രിമിനലുകളുടെ പട്ടിക പൊതുജനങ്ങള്‍ക്കു മുന്നില്‍ പ്രസിദ്ധീകരിക്കുമെന്നും വാര്‍ത്താസമ്മേളനത്തില്‍ അദ്ദേഹം പറഞ്ഞു. കേരളത്തിലെ ഐ.എസ് സാന്നിധ്യം ചര്‍ച്ച ചെയ്യാന്‍ ഇന്റലിജന്‍സ് ഉദ്യോഗസ്ഥരുടെ യോഗം വിളിക്കും. പൊലിസ് - മണല്‍ - ഭൂമി മാഫിയ ബന്ധത്തിനെതിരേ ശക്തമായ നടപടിയെടുക്കും. സൈബര്‍ വിഭാഗത്തെ കൂടുതല്‍ ശക്തിപ്പെടുത്തും. റിപ്പോര്‍ട്ടുകള്‍ വൈകുന്ന സാഹചര്യം ഒഴിവാക്കാന്‍ ഫൊറന്‍സിക് വിഭാഗത്തില്‍ കൂടുതല്‍ ആളുകളെ നിയമിക്കും. പൊലിസുകാര്‍ക്കായി ഇന്‍ഷുറന്‍സ് പദ്ധതി നടപ്പിലാക്കുന്ന കാര്യം ആലോചനയിലാണ്. ക്രൈംബ്രാഞ്ചില്‍ ജീവനക്കാരുടെ ക്ഷാമം സംബന്ധിച്ചു പരിശോധിച്ച് നടപടിയെടുക്കും. ഷാഡോ പൊലിസ് ടീമിനെ ശക്തിപ്പെടുത്തുമെന്നും തീവ്രവാദ വിരുദ്ധസേനയെ ശക്തിപ്പെടുത്തുന്നതിനുള്ള ശുപാര്‍ശ സര്‍ക്കാരിലേക്കു നല്‍കിയതായും ഡി.ജി.പി അറിയിച്ചു.