കാലിക്കറ്റ് പ്രസ് ക്ലബിന്റെ മുഷ്താഖ് അവാര്‍ഡ് സുപ്രഭാതം ഫോട്ടോഗ്രാഫര്‍ പി.പി അഫ്താബിന്

കോഴിക്കോട്: കാലിക്കറ്റ് പ്രസ് ക്ലബ്ബിന്റെ 2022ലെ മുഷ്ത്താഖ് സ്‌പോര്‍ട്‌സ് ജേണലിസം അവാര്‍ഡിന് 'മെട്രൊ വാര്‍ത്ത' സ്‌പോര്‍ട്‌സ് എഡിറ്റര്‍ സി.കെ. രാജേഷ് കുമാറും ഫോട്ടോഗ്രാഫി അവാര്‍ഡിന് 'സുപ്രഭാതം' മലപ്പുറം യൂണിറ്റ് ഫോട്ടോഗ്രാഫര്‍ പി. പി. അഫ്താബും അര്‍ഹരായി.

പ്രമുഖ കളിയെഴുത്തുകാരനായിരുന്ന പി.എ.മുഹമ്മദ്‌കോയ എന്ന മുഷ്ത്താഖിന്റെ സ്മരണാര്‍ഥം കോഴിക്കോട് ജില്ലാ ഫുട്ബാള്‍ അസോസിയേഷന്റെ സഹകരണത്തോടെ ഏര്‍പ്പെടുത്തിയ അവാര്‍ഡ് 15,000 രൂപയും പ്രശസ്തി പത്രവുമടങ്ങുന്നതാണ്.

2022ഒക്ടോബര്‍ 24ന് സുപ്രഭാതം പത്രത്തില്‍ പ്രസിദ്ധീകരിച്ച, സംസ്ഥാന സബ് ജൂനിയര്‍ അത്‌ലറ്റിക് മീറ്റില്‍ 3000 മീറ്റര്‍ സ്റ്റീപ്പിള്‍ചേസില്‍ വാട്ടര്‍ ജമ്പ് ചെയ്യുന്നതിനിടെ ഹര്‍ഡിലില്‍ കാലുതെന്നി അത് ലറ്റ് വീഴുന്ന ചിതമാണു അഫ്താബിനെ അവാര്‍ഡിന് അര്‍ഹനാക്കിയത്.

2022 ജൂലൈ 25 മുതല്‍ ഏഴു ദിവസങ്ങളിലായി മെട്രോ വാര്‍ത്തയില്‍ പ്രസിദ്ധീകരിച്ച, 'കായിക സിദ്ദി തേടി' എന്ന ലേഖന പരമ്പരക്കാണ് രാജേഷ്കുമാറിന് പുരസ്‌കാരം. ആഫ്രിക്കയില്‍ നിന്ന് നൂറ്റാണ്ടുകള്‍ക്ക് മുമ്പ് ഇന്ത്യയിലെത്തിയ സിദ്ദി സമൂഹത്തിന് ഇന്ത്യന്‍ കായിക രംഗത്തിന് വലിയ നേട്ടങ്ങളുണ്ടാക്കാന്‍ സാധിക്കുമെന്ന ആശയമാണ് ലേഖന പരമ്പര മുന്നോട്ടുവെക്കുന്നത്.

പ്രമുഖ കളിയെഴുത്തുകാരായ എ.എന്‍. രവീന്ദ്രദാസ്, കമാല്‍ വരദൂര്‍, കെ.എം.നരേന്ദ്രന്‍ എന്നിവരടങ്ങിയ ജൂറിയാണ് അവാര്‍ഡ് നേടിയ പരമ്പര തെരഞ്ഞെടുത്തതെന്ന് പ്രസ് ക്ലബ്ബ് പ്രസിഡന്റ് എം.ഫിറോസ്ഖാനും സെക്രട്ടറി പി.എസ്.രാകേഷും വാര്‍ത്താക്കുറിപ്പില്‍ അറിയിച്ചു. പ്രമുഖ ഫോട്ടോഗ്രാഫര്‍മാരായ ടി. മോഹന്‍ദാസ്, പി. ജെ.ഷെല്ലി,മുതിര്‍ന്ന പത്രപ്രവര്‍ത്തകന്‍ പി. കെ. രവീന്ദ്രന്‍ എന്നിവരടങ്ങുന്ന ജൂറിയാണ് ഫോട്ടോ അവാര്‍ഡ് ജേതാവിനെ തെരഞ്ഞെടുത്തത്.

പി.പി അഫ്താബിന് ഇത് രണ്ടാം തവണയാണ് മുഷ്ത്താഖ് ഫോട്ടോഗ്രഫി അവാര്‍ഡ് ലഭിക്കുന്നത് (2016, 2022) . 2012ല്‍ മാധ്യമ മേഖലയില്‍ എത്തിയ അഫ്താബ് 2014 മുതല്‍ സുപ്രഭാതം പത്രത്തിന്റെ കോഴിക്കോട്, മലപ്പുറം യൂണിറ്റുകളില്‍ ജോലി ചെയ്ത് വരുന്നു.

2022ല്‍ മലപ്പുറം ജില്ലാ ഒളിമ്പിക്‌സ് അസോസിയേഷന്‍ സ്‌പോര്‍ട്‌സ് ഫോട്ടോഗ്രഫി അവാര്‍ഡ്, 2021ല്‍ സംസ്ഥാന ഒളിമ്പിക്‌സ് അസോസിയേഷന്‍ സ്‌പോര്‍ട്‌സ് ഫോട്ടോഗ്രഫി മീഡിയ അവാര്‍ഡ് തുടങ്ങിയവ ലഭിച്ചിട്ടുണ്ട്. മലപ്പുറം ചാപ്പനങ്ങാടി പാലപ്പറമ്പന്‍ ഹൗസില്‍ പരേതനായ പി.പി അലവിക്കുട്ടി കെ. മുംതാസ് ദമ്പതികളുടെ മകനാണ്. പി.എം മന്‍ഷുബയാണ് ഭാര്യ. മകള്‍: നോഷി മുംതാസ്.

പാലാ മരങ്ങാട്ടുപിള്ളി സ്വദേശിയായ സി.കെ. രാജേഷ് കുമാറിന് ഇത് മൂന്നാം തവണയാണ് (2012, 2017, 2022) മുഷ്ത്താഖ് അവാര്‍ഡ് ലഭിക്കുന്നത്. പാമ്പന്‍ മാധവന്‍ അവാര്‍ഡ് (2017),സ്‌കൂള്‍ മീറ്റ് സമഗ്ര റിപ്പോര്‍ട്ടിങ്ങിനുള്ള വിദ്യാഭ്യാസ വകുപ്പിന്റെ അവാര്‍ഡ് (2019) തുടങ്ങി വിവിധ ബഹുമതികള്‍ ലഭിച്ചിട്ടുണ്ട്.നാലു വര്‍ഷമായി മെട്രൊ വാര്‍ത്തയില്‍ പ്രവര്‍ത്തിക്കുന്നു. 2005 മുതല്‍ 2019 വരെ ദീപികയിലായിരുന്നു.
ലോകകപ്പ് ഫുട്ബാള്‍ (2014, 2022 ) കോമണ്‍വെല്‍ത്ത് ഗെയിംസ്, ഏഷ്യന്‍ അത് ലറ്റിക് ചാംപ്യന്‍ഷിപ്പുകള്‍, ക്രിക്കറ്റ് ലോകകപ്പുകള്‍, അണ്ടര്‍ 17 ലോകകപ്പ് ഫുട്‌ബോള്‍, ഐ പി എല്‍, ഐഎസ്എല്‍, തുടങ്ങി നിരവധി അന്താരാഷ്?ട്ര ദേശീയ മല്‍സരങ്ങള്‍ റിപ്പോര്‍ട്ട് ചെയ്തിട്ടുണ്ടു. ഭാര്യ ലക്ഷ്മി പ്രിയ പി.എസ് സെക്രട്ടേറിയറ്റില്‍ സെക്ഷന്‍ ഓഫീസറാണ്. മക്കള്‍: ശ്രേയസ്.ആര്‍, നവ്ദീപ്.