ദിവസക്കൂലിയായി പത്തു കിലോ അരിയായിരുന്നു നിശ്ചയിച്ചിരുന്നത്. ഇതു ചോദിച്ചതിനായിരുന്നു കൊലപാതകം

പട്‌ന: ജോലിയെടുത്തതിനുള്ള ദിവസക്കൂലിയായ പത്തു കിലോ അരി ചോദിച്ചതിന് ദലിത് യുവാവിനെ കൊന്നു മൃതദേഹം തോട്ടിലൊഴുക്കി. ബിഹാറിലെ നളന്ദയിലെ ബഹദൂര്‍പൂരില്‍ കഴിഞ്ഞ ദിവസമാണ് സംഭവം.

25കാരനായ ഉപേന്ദ്ര രവിദാസാണ് കൊല്ലപ്പെട്ടത്. ദിനേശ് മെഹ്‌തോ എന്നയാളുടെ കൃഷിയിടത്തിലായിരുന്നു ഉപേന്ദ്രയ്ക്കു ജോലി. ദിവസക്കൂലിയായി പത്തു കിലോ അരിയായിരുന്നു നിശ്ചയിച്ചത്. 

 

ജോലിക്കു ശേഷം ഇതു ചോദിച്ചപ്പോള്‍ പിന്നീട് വാങ്ങാന്‍ പറയുകയും ദിവസങ്ങള്‍ക്കു ശേഷം വീണ്ടുമെത്തിയപ്പോള്‍ ദിനേശും സംഘവും ഇയാളെ അടിച്ചു കൊന്ന് മൃതദേഹം തോട്ടിലൊഴുക്കുകയുമായിരുന്നു.

ഞായറാഴ്ച മുതല്‍ കാണാതായിരുന്ന ഉപേന്ദ്രയുടെ മൃതദേഹം കഴിഞ്ഞ ദിവസമാണ് കണ്ടെത്തിയിരുന്നത്. ഉപേന്ദ്രയുടെ ബന്ധുവായ സിക്കന്ദറിനും മര്‍ദനമേറ്റിരുന്നു. ഇയാള്‍ പ്രദേശത്തുനിന്ന് ഓടി രക്ഷപ്പെടുകയായിരുന്നു.

കല്ലുകള്‍ വച്ചുകെട്ടിയ നിലയില്‍ മൃതദേഹം കണ്ടെത്തിയതോടെ ദിനേശ് മെഹ്ത ഒളിവിലാണെന്നാണ് വിവരം. ഇയാളെ അറസ്റ്റ് ചെയ്യാനായിട്ടില്ല.