കൂട്ടക്കുരുതി ന്യായീകരിക്കാന്‍ ഇസ്‌റാഈല്‍ 85 ലക്ഷം ഡോളര്‍ മുടക്കി ഓണ്‍ലൈന്‍ കാംപയിന്‍

പാരിസ്: ഗസ്സയില്‍ ഇസ്‌റാഈല്‍ നടത്തുന്ന കൂട്ടക്കുരുതി ന്യായീകരിക്കാന്‍ ഗ്രാഫിക്‌സ് ചിത്രങ്ങളും മറ്റും ഉപയോഗിച്ച് ഇസ്‌റാഈലിന്റെ ഓണ്‍ലൈന്‍ കാംപയിന്‍. ഗസ്സയിലെ പിഞ്ചുകുഞ്ഞുങ്ങളെ ലക്ഷ്യമാക്കിയാണ് മൂന്നാഴ്ചയോളം വ്യോമാക്രമണം നടത്തിയത്. കൊല്ലപ്പെട്ടവരില്‍ പകുതിയോളം പേര്‍ കുട്ടികളും സ്ത്രീകളും. ഗസ്സയില്‍ നിന്നുള്ള കാഴ്ചകള്‍ ലോകത്തെ കണ്ണീരിലാഴ്ത്തുകയാണ്.

ആക്രമണം വംശഹത്യയിലേക്ക് കടന്നതോടെ നേരത്തെ യൂറോപ്പില്‍നിന്നടക്കം ഇസ്‌റാഈലിനു ലഭിച്ച പിന്തുണ കുറഞ്ഞു. പടിഞ്ഞാറന്‍ രാജ്യങ്ങളില്‍ കഴിഞ്ഞ ദിവസം ഫലസ്തീന്‍ അനുകൂല കൂറ്റന്‍ റാലികളും നടന്നിരുന്നു. ഇസ്‌റാഈലിനെ യു.എസ് ഭരണകൂടം പിന്തുണയ്ക്കുന്നുണ്ടെങ്കിലും അവിടെ ജനങ്ങള്‍ ഇസ്‌റാഈലിന് എതിരാണ്. ന്യൂയോര്‍ക്ക്, സാന്‍ഫ്രാന്‍സിസ്‌കോ, മിഷിഗണ്‍ എന്നിവിടങ്ങളില്‍ പതിനായിരങ്ങള്‍ പങ്കെടുത്ത റാലി ഇസ്‌റാഈലിനെയും യു.എസിനെയും ഞെട്ടിച്ചു. ന്യൂയോര്‍ക്കില്‍ ജൂതരും പ്രത്യേകമായി ഇസ്‌റാഈലിന്റെ വംശഹത്യയ്‌ക്കെതിരേ റാലി നടത്തിയിരുന്നു.

വംശഹത്യ തങ്ങളുടെ പേരില്‍ വേണ്ട എന്ന പ്ലക്കാര്‍ഡുകളുമായാണ് ജൂത സംഘടനകള്‍ റാലി നടത്തിയത്. ഈ സാഹചര്യത്തിലാണ് ഗ്രാഫിക്‌സ് ചിത്രങ്ങടക്കം ഉപയോഗിച്ച് ഇസ്‌റാഈല്‍ തങ്ങള്‍ക്കെതിരായ വികാരം ശമിപ്പിക്കാന്‍ ശ്രമിക്കുന്നത്.

ഒക്ടോബര്‍ 7 ന് ഹമാസ് നടത്തിയ ഓപറേഷന്‍ 'ഖുദ്‌സ് സ്റ്റോമില്‍' ഇസ്‌റാഈലില്‍ 1,400 പേരാണ് കൊല്ലപ്പെട്ടത്. അന്നു മുതല്‍ ഗസ്സയില്‍ ഇസ്‌റാഈല്‍ നടത്തിയ ആക്രമണത്തില്‍ 8,300 പേരാണ് കൊല്ലപ്പെട്ടത്. ഇതില്‍ 3000 പേര്‍ കുട്ടികള്‍.

യൂറോപ്പിലാണ് ഇസ്‌റാഈല്‍ അനുകൂല ഓണ്‍ലൈന്‍ പ്രചാരണം നടക്കുന്നത്. ഒരു പോസ്റ്റില്‍ കത്തിക്കരിഞ്ഞ കുഞ്ഞിന്റെ ചിത്രത്തില്‍ പാത്തോളജിസ്റ്റ് വിശദീകരിക്കുന്നതാണ്. ഈ കുഞ്ഞ് മരിച്ചത് ഹമാസ് ആക്രമണത്തിലാണെന്നാണ് ഇസ്‌റാഈല്‍ അവകാശവാദം.

ഇസ്‌റാഈലിനോട് സഹതാപം സൃഷ്ടിക്കുംവിധമുള്ള കാര്‍ട്ടൂണുകളും പ്രചരിക്കുന്നുണ്ട്. യൂറോപ്പിലെ വലതുപക്ഷ തീവ്രസംഘടനകളും ഇന്ത്യയിലെ സംഘ്പരിവാര്‍ അനുകൂലികളും ഇവ പ്രചരിപ്പിക്കുന്നുണ്ട്. തങ്ങളുടെ ആക്രമണം സ്വയംരക്ഷയ്ക്കു വേണ്ടിയുള്ളതാണെന്നാണ് കാര്‍ട്ടൂണുകളിലെ ധ്വനി.

ഇസ്‌റാഈല്‍ പ്രചരിപ്പിക്കുന്ന ഗ്രാഫിക്‌സ് ചിത്രത്തിന് ഗൂഗിള്‍ വിലക്കേര്‍പ്പെടുത്തിയിട്ടുണ്ട്. ഹമാസും ഐ.എസും ഒരുപോലെയാണ് എന്ന് പറയുന്ന പോസ്റ്റുകളും വ്യാപകമാണ്. ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹുവിന്റെ ട്വീറ്റും ഹമാസും ഐ.എസും തുല്യമാണെന്നാണ് ആരോപിക്കുന്നത്. ഗസ്സയിലെ ഏറ്റവും വലിയ ആശുപത്രിയായ അല്‍ ശിഫ ഭീകരരുടെ താവളമാണെന്നും നെതന്യാഹു ട്വീറ്റില്‍ ആരോപിക്കുന്നു. ഇതിന്റെ ഗ്രാഫിക് വിഡിയോയും പുറത്തുവിട്ടിട്ടുണ്ട്.

എങ്ങനെയാണ് തങ്ങള്‍ 2023 ല്‍ ആശയവിനിമയം നടത്തുന്നതെന്ന പേരില്‍ ഇസ്‌റാഈല്‍ വിദേശകാര്യ മന്ത്രാലയത്തിലെ ഇമ്മാനുവല്‍ നാഹ്‌ഷോണിന്റെ വിഡിയോയും ഉണ്ട്. 100 കോടി പേര്‍ ഈ വിഡിയോ കണ്ടെന്നാണ് നാഹ്‌ഷോണ്‍ പറയുന്നത്. 30 രാജ്യങ്ങളില്‍ നിന്നുള്ളവരാണ് വിഡിയോ കണ്ടത്. സംറഷ് എന്ന എസ്.ഇ.ഒ കമ്പനിക്ക് വിഡിയോ പ്രമോഷനുവേണ്ടി വന്‍ തുക നല്‍കിയിരുന്നുവെന്നും അദ്ദേഹം പറയുന്നു. 85 ലക്ഷം ഡോളറാണ് കമ്പനി ഇതിനായി ആവശ്യപ്പെട്ടത്.

ഫ്രാന്‍സിലാണ് ഈ വിഡിയോ പ്രചരിപ്പിക്കാന്‍ ഇസ്‌റാഈല്‍ ടാര്‍ഗറ്റ് നല്‍കിയത്. ഗസ്സയില്‍ വെടിനിര്‍ത്തല്‍ വേണമെന്നാണ് ഫ്രാന്‍സിന്റെ നിലപാട്. തീവ്ര വലതുപക്ഷ, മുസ്‌ലിം വിരുദ്ധ നിലപാട് സ്വീകരിക്കുന്ന ഇമ്മാനുവല്‍ മാക്രോണും ഇസ്‌റാഈല്‍ ആക്രമണങ്ങളെ അനുകൂലിക്കുന്നില്ല. ഫ്രാന്‍സിലാണ് യൂറോപ്പില്‍ ഏറ്റവും കൂടുതല്‍ ജൂതരുള്ളത്. അറബ് മുസ്‌ലിംകളും കൂടുതലുണ്ട്. ഇവിടെ വിഡിയോ പ്രചരിപ്പിക്കാന്‍ 4.6 ദശലക്ഷം ഡോളറാണ് ഇസ്‌റാഈല്‍ ചെലവാക്കിയത്.

ജര്‍മനിയില്‍ വിഡിയോ പ്രചരിപ്പിക്കാന്‍ 24 ലക്ഷം ഡോളറും യു.കെയില്‍ 12 ലക്ഷം ഡോളറും ഇസ്‌റാഈല്‍ നല്‍കിയെന്ന് സംറഷ് കമ്പനി പറഞ്ഞു.