ന്യൂയോര്‍ക്ക്: അഫ്ഗാനിസ്ഥാന്റെ പ്രതിനിധിയായി താലിബാന്‍ സര്‍ക്കാരിലെ വിദേശകാര്യമന്ത്രിയെ സാര്‍ക് ഉച്ചകോടിയില്‍ പങ്കെടുപ്പിക്കണമെന്ന പാക് ആവശ്യം ഇന്ത്യയുള്‍പ്പെടെയുള്ള അംഗരാജ്യങ്ങള്‍ നിരാകരിച്ചു.
പുറത്താക്കപ്പെട്ട അശ്‌റഫ് ഗനി സര്‍ക്കാരിന്റെ പ്രതിനിധിയെ യോഗത്തില്‍ പങ്കെടുപ്പിക്കരുതെന്ന് പാകിസ്താന്‍ വാശിപിടിച്ചു. ഭിന്നിപ്പിനെതുടര്‍ന്ന് ഈ മാസം 25ന് ന്യൂയോര്‍ക്കില്‍ നടത്താനിരുന്ന സാര്‍ക് സമ്മേളനം റദ്ദാക്കി.
യു.എന്‍ പൊതുസഭാ സമ്മേളനത്തിനിടെ ദക്ഷിണേഷ്യന്‍ രാജ്യങ്ങളുടെ കൂട്ടായ്മയായ സാര്‍ക് യോഗം ചേരാനായിരുന്നു നിശ്ചയിച്ചിരുന്നത്.
എല്ലാ അംഗരാജ്യങ്ങളും യോജിക്കാത്തതിനാല്‍ യോഗം ഒഴിവാക്കുകയാണെന്ന് അധ്യക്ഷ പദവിയിലുള്ള നേപ്പാള്‍ വിദേശകാര്യ മന്ത്രാലയം അറിയിച്ചു. അനൗപചാരിക യോഗത്തില്‍ താലിബാന്‍ സര്‍ക്കാരിന്റെ പ്രതിനിധിയെ പങ്കെടുപ്പിക്കണമെന്ന പാക് ആവശ്യത്തോട് ഭൂരിപക്ഷം അംഗരാജ്യങ്ങളും വിയോജിക്കുകയായിരുന്നു. രാജ്യം വിട്ട അശ്‌റഫ് ഗനി സര്‍ക്കാരിലെ പ്രതിനിധികളെ സാര്‍ക് വിദേശകാര്യ മന്ത്രിമാരുടെ യോഗത്തില്‍ ഒരുനിലയ്ക്കും പങ്കെടുപ്പിക്കരുതെന്ന് പാകിസ്താന്‍ വാശിപിടിച്ചത് പ്രശ്‌നം വഷളാക്കി.
പാകിസ്താന്റെ ഈ ആവശ്യത്തോടും അംഗരാജ്യങ്ങള്‍ വിയോജിച്ചു. അഫ്ഗാനെ കൂടാതെ ഇന്ത്യ, പാകിസ്താന്‍, ബംഗ്ലാദേശ്, ഭൂട്ടാന്‍, നേപ്പാള്‍, മാലദ്വീപ്, ശ്രീലങ്ക എന്നിവയാണ് സാര്‍ക് രാജ്യങ്ങള്‍.