തൃശൂര്‍: ജൂബിലി മിഷന്‍, അമല മെഡിക്കല്‍ കോളജുകളിലെ നഴ്‌സുമാരുടെ സമരത്തില്‍ അനുകൂല തീരുമാനമാകാത്തതിനെ തുടര്‍ന്ന് യു.എന്‍.എയുടെ നേതൃത്വത്തില്‍ നഴ്‌സുമാര്‍ ബിഷപ് ഹൗസിനു മുമ്പിലെ റോഡില്‍ കുത്തിയിരുന്നു പ്രാര്‍ഥനാ സമരം നടത്തി പ്രതിഷേധിച്ചു. രണ്ട് മെഡിക്കല്‍ കോളജുകളിലും നഴ്‌സുമാരുടെ വേതനവര്‍ധനവില്‍ അനുകൂല തീരുമാനമുണ്ടാകുന്നതുവരെ സമരം ചെയ്യുമെന്നാണ് യു.എന്‍.എയുടെ നിലപാട്. 

ഇന്നലെ ഉച്ചതിരിഞ്ഞ് മൂന്നിന് മെഡിക്കല്‍ കോളജുകളിലെ യു.എന്‍.എയുടെ യൂനിറ്റ് ഭാരവാഹികളും മാനേജ്‌മെന്റും തമ്മില്‍ ചര്‍ച്ച നടന്നിരുന്നു. 

അതിരൂപത മെത്രാപ്പോലീത്ത മാര്‍ ആന്‍ഡ്രൂസ് താഴത്ത് അധ്യക്ഷത വഹിച്ച ചര്‍ച്ചയും തീരുമാനമാകാതെ പിരിഞ്ഞ സാഹചര്യത്തിലാണ് കുത്തിയിരുപ്പ് സമരം നടത്തുന്നത്. സമരം നടത്തുന്നതറിഞ്ഞ് ജില്ലകളിലെ വിവിധ ആശുപത്രികളില്‍നിന്ന് നഴ്‌സുമാര്‍ തൃശൂരിലേക്ക് രാത്രി വൈകിയും എത്തി. ഇന്ന് മറ്റ് ജില്ലകളില്‍നിന്നും നഴ്‌സുമാര്‍ സമരത്തില്‍ അണിചേരുമെന്ന് യു.എന്‍.എ ഭാരവാഹികള്‍ അറിയിച്ചു.