പേരാമ്പ്ര: നൊച്ചാട് ഗ്രാമപഞ്ചയത്ത് ഏഴാം വാര്‍ഡില്‍പ്പെട്ട വാളൂര്‍ നടുക്കണ്ടിപാറയില്‍ നടന്ന ആക്രമണത്തില്‍ വീട്ടുകാര്‍ക്കു പരുക്കേറ്റു. പരുക്കേറ്റ കരികണ്ടന്‍തറയില്‍ കുട്ടിഹസ്സന്‍, ഭാര്യ കദീജ എന്നിവരെ പേരാമ്പ്ര താലൂക്ക് ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസം വൈകിട്ടാണു സംഭവം. വീട്ടില്‍ ടി.വി കണ്ടുകൊണ്ടിരുന്ന ഇരുവരെയും അയല്‍വാസിയായ യുവാവ് മദ്യപിച്ചെത്തി ആക്രമിക്കുകയായിരുന്നു. സംഭവത്തില്‍ ടി.വിയും വീട്ടുപകരണങ്ങളും നശിച്ചു. മര്‍ദനത്തില്‍ തലയ്ക്കും കൈക്കും പരുക്കേറ്റ കുട്ടിഹസ്സനെ അക്രമിക്കുന്നതു തടഞ്ഞാണു ഭാര്യ കദീജക്കു കൈക്കു പരുക്കേറ്റത്.
ഇവരുടെ വീട്ടില്‍ നിന്നു അനധികൃതമായി വൈദ്യുതി കണക്ഷന്‍ നല്‍കാത്തതിലുള്ള അമര്‍ഷമാണ് അക്രമത്തില്‍ കലാശിച്ചതെന്നു വീട്ടുകാര്‍ ആരോപിക്കുന്നു. സംഭവത്തില്‍ ഇരുവരുടെയും പരാതിയില്‍ പേരാമ്പ്ര പൊലിസ് കേസെടുത്തു.